DIN RENG LAIA TLUTE

26th January 2015, Republic Day vawi 66 na ka va chhim ve a, stand at ease a Governor thusawi ngaihthlak laia naupang tlu ka hmu hnem mai a, hei hi tih reh theih a ni. Zirtirtuten an morning devotion lai pawhin tlu an hmu fo tih pawh ka hria.

A chhan tam tak chu a awm a, mah se ṭhalai hrisel tak, darkar khat vel che loa din vanga tluk ngawt tur a ni lo. Kan thisen hi ke lam aṭanga lung thlenga pump chho tur chuan tihrawl hi a chet ve reng a ngai a. A nih loh chuan thluakin thisen a hmu tawk lo a, engmah hre loin an tlu mai ṭhin.

Hei hi a tih reh dan chu che loa an din reng lai khan ke chawn leh mal tihrawl zawng zawng, theih anga sekin lungphu aia rang si loin a khat nuam tawka tih sek reng tur a ni.

Ban leh tihrawl dang pawh tih seka thlah leh a, tih sek leh a, thuk taka thawk lak zauh zauh bawk tur. Chuti a nih loh chuan i pum leh malah ringawt khan i thisen zawng zawng a tling vek thei. Hei hi zirtirtuten an nau­pangte devotion tuala intlar hun lai hian kum khatah vawi hnih tal sawi tur.

A awmzia ber chu, che si loa ngawi renga darkar khat dawn i din chuan a chunga ka sawi ang khian, i in san pheka thlah leh a tih reng tur a ni. Tun ṭum Republic Day a tlute pawh kha sipai an tel lo a, NCC aṭang a, a hnuai lam school naupang lam vek an ni a, hrilh loh vang an nih hmel hle.

Kan hriat tur erawh chu, hrisel lo, lung pawp (interseptal defect etc.), lung lam leh chuap ṭhat lohna nei an ni ve thei. Hei hi chu school health wing hran a awm a, school naupang hi kum khatah vawi khat aia tlem lo an check a ngai a ni. An check hian ha, beng leh mit an en ber a, lungphu hi ngaithla tel ve ziah se, a ṭha hle. Naupang heti zozaiah chuan lung ṭha lo nei an awm ngei ngei ṭhin. Muthlu reng maite hi lung ṭha lo an ni duh khawp.

Hetianga an tluk hian kaih din loh tur, zawn pawhin a khampheia zawn tur. An mut khan automatic-in thluak lamah thisen chu a phei leh mai a ni. Thil hlauhawm a nih loh rualin, i kuah din tlat chuan a thihna pawh a thlen thei tho.

School health check up a pawimawh rualin, zirtirtuten hetiang nia parade dawn phei chuan an hrilh nawn ziah tur a ni. Tlu bik nih chu an zak a, hrehawm an ti ṭhin. Lo zirtir ang che.