Chhiahtlang Govt Middle School Compound chungchang
Chhiahtlang Govt Middle School ram chungchangah tunlaiin chanchinbu Vanglaini-ah leh TV lamahte kan lo hmu a, helai thil awm dan dik tak kan hriattheih nan han ziah lan ve ka duh.
He lai ram hi a bul aṭanga hre chiang pawl ka nih ve ka ring a. Tuna buai anga lang hi a tir aṭanga Public playground atana mipui vantlangin an laihzawl a ni. Pu R. Vanneia (L) A.O a nih laia ama hoa laih a ni a, a laihnaah pawh ṭum engemaw zat ka tel ve.
Tin, he school-ah hian a building ban phun ni aṭangin zirtirtu hna pension thlengin ka thawk bawk a. He school hi kum 40 chuang a lo ding tawh a, headmaster pawh vawi nga lai an inthlak tawh. Hetih hun chhung zawng hian engmah buaina leh harsatna a awm ka hre ngai lo. Tin, he field hi school ban phun hmaa mipuiin an lo laih zawl tawh a ni nghe nghe.
School kawt mai a ni a, school naupangin games nan an hmang a, tlai school ban hnuin veng chhung miten infiam nan an hmang zui ve leh mai a, engmah harsatna a awm ngai lo. Chumai bakah he field hi school-in a rama a neih ka hre ngai hek lo.
Kum 2013 velah Aizawl lam aṭanga headmistress a rawn awm aṭangin he public playground hi school compound-a rin luh tumin a buaipui nghal char char a. Tun hma kha leh chen buaina awm ngai si lo tuna hetia a buaipui em em chhan hi ka hre lo. Building sak thar a ngai emaw eng emaw thil thar lo awm avanga compound-a rin luh ṭulna riaute a awm a nih chuan thudang ni se, chu pawh engmah a awm lo. Lo awm pawh nise school hian a hnung lamah ram rem zau tawk a nei bawk si a. Hriatthiam a har khawp mai.
School kawta public play ground chu school compound-ah land lease a rawn chhuak ta mai a. Chu veleh a venga welfare committe chuan VC ṭanglai leh ex VCP te, party tin hruaitute min ko khawm a. Chutah chuan sawiho a nih hnuin helaia public ta department rama a awm chu rem ti loin lungrual takin hotute hnena thlen leh turin an titluin hming ziah hnan vek a ni nghe nghe.
A bik takin helai veng bik Chanmari tan phei chuan helai field lo hi puipun nikhua te, YMA, KṬP te tan thil tihna tur hmun an nei lo a, chubakah nula leh tlangval tan infiamna pawh a awm miah lo. Chutichuan, kum 40 chuang mipui ta mipui laih hi Middle school compound sak ṭhat tumna ni loin, public playground hi school lam hian an chuh thar a ni zawk e.