CHATUAN MEIKHU
Masi khuang ri a reh a, Aizawl kan chuangkai ve leh ta zeuh zeuh. Bawlhhlawh paihna tlan pelh chang hian bawlhhlawh hal khu hian ngaihtuahna a chawk tho leh ṭhin.
Ka naupanlai chuan Tuirial lui dung, thlasik ṭiauchhumin a khuh var hluk khu phaizawlah chang se, duhna lai laiah goal ban han phun ila tiin duhthu ka sam fo a. Amaherawhchu, boruak lumin ṭiauchhum van boruak sang lama a hnawh kian hnu pawha he lui dung la bawh rengtu ‘chatuan meikhu’ hi a zam thui tial tialin a chhah telh telh ta mai!
Kum kalta lawk kha chuan bawlhhlawh halna zawnah hian a khu ve let let mai chauh kha a ni a, tunah chuan kawrpui thli thawin a chhemna lam hawi apiangin Tuirial lui hnar leh mawng lam thui fe thlengin a chhem darh a. Nipui lai pawhin thlasik ṭiauchhumin a bawh ang maiin buaipui thamin boruak ṭha lo a semzai ta a nih ber hi.
Keini Seling khua hian thil rapthlak tak tak kan tawk leh nawlh ṭhin. Mi khuain zu heh tia an kawh rawn ang chi pawh hi lo kal se, keini khuaah chuan a vantlang an ni ve zel mai. Hetiang kan ni chung hian bawlhhlawh sawngbawl kawngah chuan khawtlang hmangaihtute zarah sul kan lo su ve tlat.
Kum 1989 khan Tawlailir hmangin bawlhhlawh khawn a, a paihna tura paihin bul kan ṭan a. Thawktu hlawh leh Tawlailir man turte hi Hotel, dawr leh chhungkaw tinah thla kipa khawn ṭhin a ni. Kan hmalakna LAD lamin min hriatpui zarah Tawlailir bang siamna tur Rs 3000/- min pete kha a hunlai chuan a ropui asin!
Khawpui tih dan kan entawn lo thei lo a, rickshaw aṭangin tunah ke pali neiin hma kan sawn ve ta zel. Kan bawlhhlawh paihnate pawh a khu ve ta lu lu e.
Heng faina kawnga kan hma lak ṭhat dante hi PHE lam pawhin min hriatpui a, ‘model village’ ah min ngai deuh roh nge ni thil tihkhawm nikhua hian hetiang lam hawi thu sawi tur hian kan VC te hi an sawm leh ṭhin.
AMC Councillor-in a sawi ang khan kan khawpui bawlhhlawh paihna hmunpuiah hian thla khatah lirthei MMV trip 1464 leh LMV trip 768 lai mai cheng nuai 33 chuang senga paih a ni ṭhin a. Heng bawlhhlawh halna khute hi mihring tan a hrisel lo hle a ni.
Tun hma bawlhhlawh paih ṭan tirh deuh kha chuan a paihna zawn thlen chiah hian motor chhungah tho an lo lut ṭeuh a. Tunah chuan tho aiah boruak hip luh nuam lem lo tak, tur deuh ngan mai kan hip lut ta thung. Khawi zawk hi nge kan thlan ang le? ‘Bawlhhlawh hal tawh loh nise’ thuneituten an ti chung leh Fire Dept. meuh an inrawlh chunga a la khu reng tho erawh hi chu ngaihtuah chian a ngai a ni.
Mizote’n hriselna kawnga fimkhurna chang kan hriat hun meuh hi chu a pawi tur ang anga a pawi hnu a ni duh khawp mai. Chuvangin, thingtlang khaw tinin kan bawlhhlawhte pawng halral ve ngawtna chang kan hriat hma hian entawn tlaka khawpuiin bawlhhlawh sawngbawl dan kan thiam a ngai e.
Kan bawlhhlawh hal avanga boruak chhia kan siam chu thu hran, ram kan tihkan phahte a nih chuan kan hlawk dawn hlek lo mai. Kan khawpuiin entawntlak tura bawlhhlawh a sawngbawl ṭan mekna kawngah hian thu awih tur chi chuan awih mai ila, hma la tur chi chuan chak takin hma la mai teh se. Mi’n zoram kawng sir tluan pawha pipe an phum theih laiin bawlhhlawh paihna hmun khat kang lek AMC leh Fire Department ṭangkawpin an timit thei lo anga an sawite phei hi chu awih har ka tih zawng tak a ni.