Miretheite hi VIP kan ni chiah em?

Kum 2008 a Cong­ress party-in Mizo­rama sawrkarna a siam khan kan Chief Minister zahawm tak Pu Lal Thanhawla chuan, “Miretheite hi kan VIP an ni” a ti. Tin, Congress flagship programme NLUP chu an sem ta a, miretheite kan VIP tak tak dawn emaw kan ti a.

Mahse, a taka an han sem meuh chuan party mite induh­saknaah a chang chho a. Opposition party lamin, Prime Minister Special Package a ni lo, kan plan fund an sawhhek mai a ni, kan ramin kan tuar ang, tia an sawi chung pawhin, “Sai pui kal lai uitangin a bauh ding ngai lo,” tiin CM a ngeng lui. NLUP sum an sem chu kum 2013 MLA inthlan hnaiah phei chuan a aia uar sauhin Chief Minister Special package NLUP tia hming vuahin an sem chiam a nih kha.

Kum 2014 a lo inher chhuah chuan NLUP pute mawngsawh dawtin an tla a, BJP-in sawrkarna an siam ta a. NLUP an sem chhunzawm thei dawn loa an inhriat vang nge, Pu Hawla chuan kum 2014 kum laihawl velah chuan, NLUP a a tui tawh loh thu a rawn sawi a. Kum 2015 VC leh Local Council inthlan a lo hnai a, NLUP chu an sem leh ta tho a!

Assembly Budget Session hnuhnung bera zawhna leh chhanna aṭanga NLUP sum Mizoramin kan dawn tawh chu cheng vaibelchhe 1208.82 zet a ni. Sawrkar lam chuan NLUP hma­lakna turin sumah har­satna a awm lo an ti a.

Kum 2015 kan chuang kai a, mitin nghawng chhiah chi hrang hrang a rawn sang chho dawrh a, ration buhfai khulna man an tisang bawk. Mipui kan phun luih luih a, opposition party lian ber MNF phei chuan Mipui Thlavang Hauhna Kawngzawh Aizawl leh District khawpui hrang hrangah a buatsaih hial a. Cong­ress pawhin insawi thiam an tum ve bawk.

Sawrkar hian sum harsatna a tawk tih hi Chief Minister-in a sawi a. Chutih mek laiin NLUP-ah erawh sum harsatna a awm lo an ti a. Sawrkar hian mipuite min bawl a ni thei em?

NLUP an duh hun hunah an sem a, a lehlamah sum kan harsa tiin ration buhfai man tisangin, chhiah leh leiman a san theih apiang an tisang si. Zu aṭanga chhiah itin zu zawrh tir min tum a. Thisen petute thisen damlo mamawhten a thlawna an dawn ṭhinah thisen ip khat zelah Rs 550 lak an tum leh zel a. A thei faten an nawm an maka an chetna ramah rethei fate kan ip zawr zawr mai zawng a nih hi. Miretheite kan VIP ve dan hi hriatthiam a har hle a ni.