An Cancel Ngei Turah Ka Ngai
Bawngkawn leh Durtlang inkar chu humhalh bik tura sorkarin a tih kha a ni a, AMC a lo pian khan an kutah awmin, in sa tur tan pawh an phalna lak a ngai a. Tun hnaiah in sakna tur an laih chuan nghawng nasa tak a nei a, he hmun hi engtia sak leh khawih theih loin an cancel tur a ni.
He kawng chho-ah hian tun kum hnih khat chhungin in sak a tam ta hle a, kawng thlang lam phei chu a khat chho dawn tawh hial a ni. Aizawl khawpui tinuam tura humhalh a ni a, khualzin tan pawh hawi thawven nana humhalh a ni. Mahse AMC pawhin duh aiin an humhalh lo hle tih a lang reng mai. Kawng thlang lam mai ni lo, kawng chhakah in sak leh petrol pump tur buatsaih mek a awm tih kan hmu ṭhin.
Heng hmunhma humhalh tur hian AMC hian a tlin thlawt lo a ni tih chu chiang taka hmuh a ni. Tunlai ruahsur vang khan vawiin thlengin in sakna tur an laih chu a timin vak a, kawngpui chu kal harsa leh hlauhawm khawpin a siam a. A chhaka in pawh ṭhiah hial a ngai ta a ni. He hmun neitu hian AMC-ah leh Geology & Mining-ah phalna a la em? Lo phal ta se a endiktuten an va endik uluk awm lo ve? An va thiam awm lo ve?
Sorkar khauh tak, AMC kalphung ṭha leh dik kan mamawh tih he kawng chho aṭang hian a chiang em em a ni. Sorkar, a bikin Disaster Management lam pawhin khawpui chhung hi an vil uluk leh zual a ngai hle. Khâm pangah rem leh rem loin in an sa a, chhak lam leh thlang lam min mai thei tih hriat ngawih ngawihah pawh in sak phalna an pe zel a nih chuan, a petu mawhphurhna a lian hle a ni.
Tuna Durtlang kawng chho buaina pawh hi a namenlo hle . Kawngpui dang awmchhun Ṭhuampui to Selesih road lah kal hleih theih loh khawpin a chhia a, enkawltu awm lo ang mai a ni tih mipuiin an hre chiang hle. Durtlang kawng hi kawng pawimawh a ni a, he mi pakhat kopang laih vanga min vak vak mai hi a ngeiawm a, a hlauhawm bawk si. Mipui lakah pawh hmai phih fai a har ngawt ang le.
Eng ang takin thuneitute hian kalpui ang maw? A hmun hrim hrim pawh hi khawih leh theih loh khawpa cancel hmak tur chi a ni. Heti em ema mipui tibuaitu a nih vangin ngaihdam mai mai chi a ni lo ang. Kawngpuiah ruah a sur hlekin hlauhawm khawpin lei leh lung a la tla a, a laitu hian inchhir a, a hmun pawh hi kalsan vang vang a, hmalak leh tum loh burna tur chi a ni.
- Lalkhirhvela