Mizo Lânu i uiawm lua e

Hmanni lawk khan kan Biak Inah zuk leh hmuam ṭhat lohzia inhrilhriatna programme kan hmang a. Sawm a nih angin Dr. Eric-an hun min hmanpui a, hlawkpui hle turah kan inngai.

Vaihlo zial zuk lamah te leh, ei leh in lama kan dinhmun tlang-puite kan han hriat chuan tih loh tur kan tih nasatzia te kan hriat phah a; kan taksain a mamawh loh, tih ṭhan avanga kan chin dawklak, min ei hlum hma theihziate kan han hriat ve meuh chuan chawhmeh al tak baka chi kan han inchhawp tlat maite hi a lo ṭul lo ma’nge tihte kan han hre tlai khawhnu a.

Thau lam kan lo ei nasatzia te, kan taksain a mamawh loh zuk leh hmuam, a bikin khaini, sahdah, kuhva khawr te, tuibur te kan lo tih nasatzia te kan han thlirho meuh chuan, “Mizo kan ni, kan hmel a ṭha” tih hla han sa ngam ziazang hi kan ni lo hle hlawm mai.

Hnam pum pui mihring zata teha mei zu tam ber pawl kan ni te, natna ṭihbaiawm cancer vei tamna ber ram kan nih te hi kan Kelkang harhna nen hian zu inmil mawlh lova mawle! Kan chenna khawvelah vaihlo zuk avangin second 6 dan zelah mi 1 a thi ṭhin tih te, kum khat chhungin khawvela mihring 6 million thi ṭhin ang an nih thute han hriat hian vanduaina chu a ni lo mawle! kan tih luih vanga thihna ni zawk âwm tak a ni.

Zuk leh hmuam hian hmeichhia leh mipa min run mek a, a hmei a pain hmaih a nei hran lo. Tun lai tak phei chuan a ‘hmuam’ lam hian Mizo lânute pawh a rûn hneh ta hle. An bulah han awm ila tuibur rimin min lo welcome a, tuibur a nih loh pawhin khaini rim tal kan dawng a. Heng tuibur leh khaini bakah hian sahdah te phei hi chu 80% vel hian an hmuam mai awm e. Hetiang chingho hian an pen aiin sahdah leh tuiburte chu theihnghilh an hlau ta zawk a.

Kan nau nula pakhat phei chu sahdah hi a han paipawn bâwk lian thei khawp a, tuibur leh khaini lah a nghei chuang lo. Heti khawpa kan Mizo nulate zuk leh hmuamin a chim buai ta mai hi vanneihna zawng a tih theih hauh lo vang; vanduaina chi khat in tihsak ta ila kan haw mai lo’ng maw? Heti khawpa kan Mizo lanu te hmel tihemtu hi!

Keiniho hi chuan mit leh benga kan hmuh leh hriatte hi kan ngawih pui mai mai thei lo. Ram mipui ṭhatna beisei avangin hetiang thu te hi kan ziak lo thei lo. Kan Mizo ṭhalaite hmel tichhetu leh nun titawitu vaihlo, sahdah, khaini leh tuiburte hi i han bansan ṭhak hlawm teh ang u.

- Lallunghnema, Charity Lodge