WORLD BANK ROAD-AH ZU KA IN VE A...
World Bank Road-a zu ka in hma hian Govt. Complex huam chhung kawngsirah tute nen emaw kan inho a. A hmun chu kawng kawi ualau zau tak, hmandan thiam ila nuam tak tur niin ka hria. Mahse bawlhhlawh bawma paih chakawm leh thianfaitu nih erawh chakawm lo khawpin a vel leh a thlang khamte chu a hnawk ṭawp hle mai. Hetiang hmuna ka vawikhat in vena a ni a, ka vei hle mai.
Ka ṭhiante hnenah chuan khawngaih takin kan bawlh-hlawh (keimahni tih hnawk) kha chu fun ṭha ila bawlhhlawh bawmah kan paih dawn nia ka ti a. Kan zialbung chawpin kan fun haw ta a. In ka thlen hnu chuan ka ngaihtuah chhunzawm ta zel a. A hnu thla a liam hnuah World Bank Road (Zemabawk leh ITI) hnuai inkar chu kan motor (car) neih ve chhun chuan ka pan leh a. Ka va thlen chuan ka hriat ngai loh a hmei apa, a ṭhen motor chhungah, a ṭhen a biru deuhah an lo ṭhahnem khawp mai. In thlahrung tak chuan hmun khata lo in mekte chu ka va fin ve a. Chhuan tur leh chapo chhan tur ka neih ve loh avangin kawm nuam min ti ve ni ngei tur a ni; ka contact no. te min dil hlawm a. An bawlhhlawh te chu keiman ka lo paih ang tiin ka fun khawm a, a hnu thlengin phone aṭanga min rawn sawm tawk an awm nuk mai.
Ka sawi tum takah han lut leh i la. Kan awmna leh a chheh vel chu ka han fang kual a, hmun tin chu a chunga ka sawi tak Govt. Complex huam chhunga ka hmuh aia let, kan huan, kan ram/ inhmun hnaia awm atana tuman kan duh loh tur bawlhhlawh (tenawm) tinreng hmuh tur a tam khawp mai. Ka vei takzet a ni. Ka ngaihtuah ta a, kan sawrkarin zu in phalna (ka sawi sual em aw) card a siam a, kei pawn ka nei ve. Thiam taka kan in a, chhungkua leh khawtlang etc. tan pawha buaina leh harsatna siam lo, zan tairek pawha khawlai leh kilkhawr tinah thlamuang taka kan len za ho kan lo nghahhleh em em lai hian, kan zu card-a dan inziak chhiar miah loa card ka nei alawm ti niawm takin, a hun leh hmun lo a, kan khawpui neih chhun Aizawl veng hrang hrang hmel tibal khawpa hmun tin kan siam ta mai hi tu mawh nge ni ang? Ngaihdan leh kan puhmawh a inang lo viau thei. Kei ka ngaih ve dan leh ka puhmawh ber chu, i sawi zawngin i nihna a lang tih angin an bawlhhlawh paihna leh paih dan aṭang an chhungkua nihna leh inrelbawlna changkan lohzia a lang ka ti.
Han sawi thui leh zel i la. Vei ka neih avanga a hmun loa in ka nih avangin ka in dah ṭha tih min hriatsak turin chhiartute ka ngen nghal bawk a. Ka vei em avangin buara pathum kengin ka kal leh a, hmun thumah ka va khai a, kar khat hnua ka va kal leh chuan pakhatmah ka hmu ta lo.
Hemi ṭum hian ITI Veng nge Bethlehem Veng ka hre chiah lo, J.A.C. an lo kal a, an rawn hnawt darh bawrh bawrh a, midang an hnawh darh hnu chuan ka awmna an rawn pan a, min hauh hmain chibai u... in va zahawm ve... hei, in thlahrung tak leh biru lai berah ka lo in a... ka bawlhhlawh pawh hei hawn turin ka fun khawm zel a, ka lo ti zung zung a. Tun bak chu rawn in tawh bik lo la tiin min kalsan ta a. Ka rilru tak takin ka zah a, an tih awm tak an tiah ka ngai bawk. Mahni hna pawimawh kalsana khawtlang, ram leh hnam hmel tibal thei tih bo tuma an inpekna kha ka chhuangin ka theihna zawna eng emaw tala puih ka chak takzet mai.
Thu thiam takin ka hmuh ang leh hriat ang hi hmuin hria se an va ziak ṭha dawn em. Chhiar tur ka hmuh mai loh avangin ka han in ziak mualpho ve ta mai a ni.
A tawp berah chuan ṭhalai/ nu leh pa (kum bithliah awm loin) a hmei a pain dan chunga leng ang maia kan chet dan, mawl tak leh ṭhing taka kan nun dan leh awm dan ṭha lo te simin, kan zawl khawpui then fai leh chei mawi hi kan mimal tin mawhphurhna a ni tih pawm tlangin ṭan la thar turin ka sawm che u a ni.
- Veni Colney Pa
Bawngkawn, Aizawl