Zirlaibu sem daih lo - A ṭha lam
Tun kum, 2024-a Sawrkar sikul naupang lehkhabu, sikul luhtirha an sem kim theih loh chhan hi, Sawrkar sawi ang hi a nih chuan a va lawmawm ve. Sikul naupang lehkhabute hi kum hmasa lama Sawrkar sikula naupang inziaklut zat enzawna chhut ṭhin a ni. Kum tin Sawrkar sikula lut an tlem tial tial chung pawhin, Sawrkar hmasa lamah kha chuan lehkhabu an chhu daih ngai lo va, a hun takah an sem thei ngai ṭhin hek lo niin kan lo hre ṭhin a nih kha. Mipui phun thawm pawh Chanchinbu lamah kan lo hmu ṭhin.
Tun Sawrkar tharah chuan a hun takah an sem a, mahse, an sem kim vek nghal thei bik lo. A chhan chu, kum hmasa lama sikula inziaklut aia sangkhat (1000) a tam an chhu chung pawhin, sikul 1270 laiin an la chang kim thei chuang lo tih a chhutu Department, Printing and Stationery changtu Minister-in a sawi. Hemi awmzia chu kumin hian Sawrkar sikula inziaklut an pung ta hle tihna a ni. A lawmawm hle.
Tun hma lama Sawrkar sikul naupangin tlem lam an pan tial tial lai a, tun ZPM Sawrkar thara Sawrkar sikul naupang an pung ta thut hi eng nge a chhan ni thei ang?
1. He Sawrkar tharah hian mipuite hian rinna kan nghat ngam a, Sawrkar sikul pawh fate luhna tlakah kan ngai ta a ni thei.
2. Mihring kan lo pung ve deuh ta a, mahse, Private sikula lut pha ve lo mi rethei kan lo pung ta sawt a ni thei.
3. Raltlan naupangte Sawrkar sikula lut an tam a ni thei bawk.
Engpawhnise, kumina Sawrkar sikula naupang lut an tam ta hi a lawmawm hrim hrim a ni. Tin, zirlaibu chhu tura Mizoram Sawrkar ta ngei an hmang hi a ṭha hle a ni. Tun hmaa tute emaw hlawk tel ve na tur remchang zawn vanga phai lam leh private chhuttir ṭhin kha chu a muang thei ṭhin hle a nih kha.
Opposition ho pawh khan Sawrkar tihmualphona remchang hmu fuh inti takin rak chiam chiam suh u. Ram tana thil ṭha lamahte hi chuan rilru dik pu ve ula, Mizoram hi in ram ve tho a nih hi. Social media lama intiṭawngkam thiam taka Sawrkar in diriam dante hi a zahthlak. Zirlaibute hi sikul luh hnua naupang zat mila chhut a ni ngai lo tih te hi hriat ve tur. Mizorama Sawrkar sikul naupang zawng zawng hnena sem theih tura buatsaih peih fel diam tur hian, ni hnih khat chauh ni lovin, hun rei tak a ngai tihte hi i hrethiam tlang teh ang u. Kan vaiin thil ṭhaah hi chuan rilru hmunkhatin i awm ang u.
- K. Hmingthankaia