Mitdel Dik Tak Chu Tu Nge?

Tunah hian mitdel dik chu tu nge ni tih kan sawi dâwn a. He thu chhangtu, Chanchin Ṭha hriltu (speaker) ṭha tak chuan heti hian a sawi a, "Mitdel dik tak chu mahni inhmu thei lo hi an ni," a ti. Hei hi a dik thei hle awm e.

Ni tin chanchinbuah hian chanchin thar bengvarthlak tak tak hi kan chhiar ṭhin a, a ziaktute hian kan hriat loh ṭha tak tak, thu thar min hriattir ṭhin. Tuna ka'n sawi duh tak chu political party chungchang hi a ni.

Political party-te hian a tlangpuiin an party sawi mawina an ziak ber ṭhin a, hei hi chu a sual lovah ngai ila. Amaherawhchu, mi dang party sawichhiatna an uar lutuk hi chu neutral tan chuan a ngaimawhawm a, a ninawm thei hial. Ruling party ni lo hi chuan ruling party sawichhiatna an zawng ni berin a lang ṭhin. Tu party pawh ruling se, sawisel bo an awm kher lo vang. Ruling party sawichhetu party pawh hi ruling ni ve mah se sawisel bo a ni bîkin a rinawm loh. Eng party pawh hi ruling se, an hun laiah chuan Mizoram tan eng kawng emaw berah chuan Mizoram tan ṭhatna leh hlawhtlinna kawng eng emaw tal an nei ṭhin.

A bik takin, tun hunah hian ZPM party chuan sawrkarna an chang a; ka sawi duh tak chu, MNF party thuchhuah a awm chuan ZPM party sawiselna hlir hi an tarlang a ni ber. Kan sawi tâk ang khan, eng party pawh ruling se, sawisel bo an awm bîk hauh lo vang. Mi dang dik lohna an hmu thei a, anmahni dik lohna lam erawh chu an hmu thei hauh lo.

Chanchin ṭha hriltu speaker ṭha tak Jaikara chuan, "Mitdel dik tak chu mahni inhmu thei lo hi an ni," a ti hi a dik chiah a ni. Tuna rullng party sawiseltu leh an dik lohna hmu thei viau si hi ruling an nih lai khan an dik lohna leh an fel lohna lam chu an hmu thei hauh si lo a nih kha.

Chuvangin, political party tinte hian an party hmalakna mipui hnena ṭhahnemngai taka an sawi hi a dik tho a, mi dang party sawiselna leh dik lohna zawng hram hram zawnga party an hruai hi chu a dik lo a ni. Engtin nge Bible-in a sawi kha, "Sawisel suh u, sawisela in awm loh nan, in sawisel ang bawkin an sawisel ang che u," tih kha party tinte hian hre mawlh rawh se.

Mizoram chu Kristian ram tih kan ni ṭhin a, political party tinte hian mi dang party dik lohna leh sawiselna zawng kher lovin, ram leh hnam hmasawnna turin politics hi hmang hram hram teh se. Mi dang dik lohna hmu thei viau si, mahni dik lohna hmu thei si lo chu MITDEL DIK TAK an ni tih hi hre ṭheuh rawh se.

- LZ Colney