Dan zawm hi mipuiin kan zo lo?

Mizo mipui zinga mi tam ber hian ‘Dan zawma dik taka thil tihte hi mipuiin kan zo lo’ tih hi kan ngaihdan nghet a ni a. A taka kan ram kalphungin hetiang ngaihdan nei lo thei loa min siam tlat mai hi chu a vanduaithlak a, ram tan a pawi em em bawk. Mahse, kan tun dinhmunah hi chuan he ngaihdan hi a dikin a lang tlat si a ni! A dik nachhan chu, kan ramah mi lian, mi thil ti thei, mi thiam, ram hruaitute leh an vuavângte’n an duh hun leh a theih hun hunah chuan dan lo leh a kawng awlsam zawnga thil an tih fo theih bik reng lai hian, mipui nawlpui, kut hnathawk leh rethei zawkte chuan dan ang leh dik taka thil lo tih bik zel hi, kan tlin reng bik ṭhin loh vang a ni ber!

Dan ang loa ram hruaitu, mi lian, thil ti theite leh an vua leh vangte’n awlsam taka thil an tih ṭhinin nghawng ṭha lo pui pui, ram pawi lian khawih tham, project bo, sum vbc sang tam riral, dan loa duhsak zawng hna pek, etc, media hrang hranga lo lang chuai chuai ṭhinte hi mipui mimirte hian kan lo hriain kan lo hmu ve reng a. Hetih lai hian mipui mimir chu ram khua leh tui ṭha ni tur leh dan zawm a, dan anga thil ti vek tura hrilh leh beisei kan ni reng ṭhin thung. Kan ram hruaitute leh mi lian, mi thiamte anga a awlsam zawnga thil tih ve duhin, dan zawm lote’n thil han ti ve dawn ila, police leh NGO zuam leh ngam tawk kan lo ni si, man leh dodal kan tawk leh ṭhin bawk si a. Chuvangin mipui mimirte tan chuan a awlsam leh short-cut zawngin, dan ang kher loa thil tih ve hi a theih thui lo a. Man chhuah loha vanneih chang chu awm ve bawk ṭhin mah se, a khât a. Chuvangin, mipui nawlpui hi chuan a tlangpuiin, rit tia zo lo hle chungin, ‘Dan zawma dik taka thil tihte hi mipuiin kan zo lo’ ti ti mah ila, dan kan zawm hram a ngai tho ṭhin.

Hetih lai hian, kan ram hruaitute’n a taka kan ram an hruai danin a zir bawk a, a theih hun apianga dan zawm loh hi thil tenauah pawh ram nunphungah hian a lut nghet tawh khawp a. Kawnga motor tlan ni se, chhun pachangah pawh traffic point-ah traffic duty an awm loh hlek nikhua pawhin, wrong side-a traffic point tlan tlang theih chu chin ṭhan a ni a. Khawi hmunah pawh miin min pui se la, dan ang taka min puih aiin, dan loa min han short-cut pui khan, a ṭanpuitu tan pawh, ṭanpuina dawngtu tan pawh inchhuanna tham leh induhsakna tak tak anga ngaih a ni bik ṭhin a ni.

Hetiang deuh hi thil lianah pawh, thil te-ah pawh kan nunphung a ni tawh a. Chutiang tak chuan kan ram inkaihhruaina hnuaiah hian dan ang loa thil tih theih hi a chung ber aṭanga a hniam ber thlengin nuna bet a ni tawh. Chutih laia dan anga thil lo tih bik hi mipui nawlpui tan ‘kan zo lo’ tih mai loh theih pawh a ni lo reng a ni.

Dan zawm hi a harsat ber lai hun leh hmun chu ‘dan zawm tur’ tih laia mi ṭhenkhat, an duh huna dan zâwm lo mai thei, man chhuah leh hrem tawh phah si lo, awlsamna leh hamṭhatna hmuhpui thei bawk an awm reng si laia, ṭhenkhat dang ve thung tan, dan zawm reng a ngaih bik lai hi a ni. Tin, dan zawm loh kalphung hi khawtlang nuna a luh ngheh tawh phei chuan, dan zawm bik nih hi a harsain thâ a na duh leh zual!

A nih, engtin nge kan Mizopuite ngei ram hmasawn leh changkang, US, Switzerland, Singapore, Australia, tih vela va zinte hian chu’ng ram mipuite’n an ram dan an ngaih pawimawhzia leh an zawm ṭhatzia hahipa an rawn sawi haw a, chu chu anmahni ngei pawhin ṭha an tihzia leh a engthawlthlak an tihziate pawh an rawn sawi ṭhin si le? Engtin nge kha’ng ramah khan mipuite’n dan zawm kha harsa, thanatthlak an tih ve loh a, ‘kan zo lo’ pawh an tih ve ngai loh? Chutih a hnekin engtin nge, zo taka an nunphungah an seng luh a, ṭha leh nuam pawh an tih zawk pui theih si? A chhan chu, an ram thuneitu leh hruaitute khan dan zawm loa thil tih an ching ve lo a, ram chhung mipui zawng zawng pawh dan zawm turin an kaihruai a. Keini’n he laia kan ram hruaitute dan zawm loh thil tih kan entawn ang chiah hian, an ram hruaitute dan zawm thil tih leh an zirtirnate chu zawm a, entawnah neiin an nunphungah an la lut thung.

Chutiang karah chuan, dan zawma thil tih chu an ram hruaitute leh an ram mi lian, mi thil ti thei leh mi thiamte hlei hleiin an uar a, dan chu ram kaihhruai nan ber an hmang bawk. Dan zawma thiltih chu, an ram mi lian mi te, a tuate pawhin an tih a nih vangin, mipui nawlpui pawhin, a tira khirh deuh anga an hmuh pawh kha, a lo khirh lohzia an hre chhuak a. A hnu zelah phei chuan dan zawm loh kalphung aiin nasa takin dan zawm thil tih chu a lo ṭha zawk tih an hmu chhuak ta bawk a. Tichuan, dan zawm kalphung hi anmahni mimal tin bakah, an ram an hnam tihhmasawn a, tihropuina hmanrua berah an hmang ta zawk a ni. Keini ram anga ‘dan zawm loh’ kalphung hi an ramah apply leh tum ta se, mipui zawk khu duh lotu leh dodaltu lian ber an ni zawk ang. Tichuan ram changkang leh ropuiah chuan, dan an zawm ṭha nasa zel ni loin, dan zawm thatna ram apiang an changkangin an ropui zel ṭhin a lo ni!

Dan kan tih hian tam takin a nihphung hi an man dik tawk ṭhin lo a. Intihbuai leh thu inchuh a awm nikhua chauha mi khirh bik ṭhenkhatte leh police, dan hre mi leh court lamin an hman tur bik emaw an ti ṭhin! Hei hi a dik lo! Dan hi chu kan ram pum inrelbawl dan tur leh kalphung tur inziahna a nih bakah, kan ni tin nunphung thunun tura siam leh hman tur an ni zawk a. Chumi zingah chuan intihbuai leh innghirngho, thu inchuh a awm nikhuaa hman tur hi chu tlem a tel ve chauh zawk a ni.

Chutianga dan hi ram pum kalphung leh kan ni tin nun thununtu atana hman tur a nih avang hian mi ṭhenkhat lakah chauh hman emaw, ṭhenkhatin an duh hun huna an hman loh theih bik emaw a nih hian, dan hian nghawng ṭha a nei thei ngai lo a, ram chhungah a ṭhena ni sa, a ṭhena ruahsur thlentu mai a ni ṭhin. Chuvangin, kan ram hi democratic republic ram, dan rorelna hnuaia awm, dan chu ram kal siamtu leh a chhunga ram mipui nunpui tura duan a nih rau chuan, dan hi ram pumah inang tlanga mi tê ber aṭanga mi lian ber lakah, tu mah hlahthlem awm loa inang tlanga hman tur a ni hrim hrim a. Chutiang tur chuan ram chhung mi ṭhenkhat ṭhahnemngai zualte hmalakna mai ni lo, ram pum kaihruaitu kan minister-te’n hma an hruai a. Anni hian ram mipui entawn tur tling khawpa ram dan zâwma ram kaihhruai thil engkim an tih a, ram mipui pawh chuti zawnga an rilru hmin a, chu lama an nunphung pawh kaihhruai a ngai a ni.

Chutianga ram dan hi kan ram hruaitute hmalakna aṭanga ram kalsiam leh mipui nunphung innghahna atan kan hman theih hnu erawh chuan mi tin, a lian ber aṭanga a tê ber thlenga kan zawm leh thil tih phunga kan neih a nih tawh dawn avangin tu mahin dan zawma thil dik tih chu thanatthlak ti leh zo lo kan awm thei tawh lo ang. Nakin zelah kan ram kalsiam atan leh kan khawtlang nun, chhungkua leh mimal nun thlenga dan hman hi a lo ṭhatzia kan hriat tikah phei chuan dan zawm kalphung hi kan thlah phal tawh ngai lo zawk ang.

Hetia ram puma inang tlanga ram dan hman vek hi mi tam tak, ram dan hnuaichhiah zawnga lo nung ṭhangte chuan an huphurh ang a. Tin, mipui nawlpui, ‘in tan ram dan zawm chu a khirh lutuk ang, in zo lo ang’ ti zawnga zirtirna lo dawng ṭhinte pawhin ‘thuneitute’n ram dan zawm vek ngai loa min hlahthlem a, min ngaihhnathiam hram hram chung pawhin heti hi kan ni a, dik takin dan zawm dawn ta ila, kan zo dawn hauh lo’ ti rilru hoin an huphurh bawk ang.

Mahse, hei hi huphurh tur chi hauh a ni tawh dawn lo. Dan zawm a harsat lai ber, mi lian leh mi thil ti theite’n an duh duha dan an zawm loh ṭhin lai pawha lo zawm thei tawh ṭhin an ni a. Mipui nawlpuite phei chu zawm loa a taka hlahthlem an nih ṭum hi a tlem em em zawk. Thingtlang kut hnthawktu dik takte phei chu dan zawm loh hlahthlem zar hi an zo pha ve ngai reng reng ṭhin lo zawk a ni. A nihna takah chuan, hetianga dan zawm a harsat ber lai pawha dan zawm thei ngat ho hi chu, kan ramah dan zawm hi ram dang anga mi tin chin, a te ber aṭanga a lian ber thlenga kan chin ni ve ta se, tuna dan zawma thil dik tak tih hi mipuiin kan zo lo tih ngaihdan neitute hlei hlei hi dan zawm nuam ti tur leh dan zawm thlah phal lo tur an ni ngei ang.

Tichuan, kan ram hi mipui beisei thleng phain hmasawn a, changkang ve tura kan duh chuan kan mi thlan, kan ram hruaitute hi ram dan kengkawha ram kaihruai tur leh, mipui pawh ram dan zawm zawnga nunphung siam tur zawnga an rilru hmina ka-hruai turin nawr ila. Chuta kan hlawhtlin hunah chuan ‘Dan zawma thil dik tih hi mipuiin kan zo lo’ ti hi kan awm tawh lo ang. Dan zawma thil tih chu hlahthlem leh ngaihhnathiam awm loa kalphung a nih tawh dawn avangin a lo ṭhatzia, hmasawnna hnar a nihzia hmu chhuakin kan thlah phal tawh ngai lo zawk ang! Hei hi khawvel ram ropuite an intihhmasawn theihna hnar a ni ang hian, keini pawhin kan intihhmasawn pui theih lohna tur a awm lo. Ram pawi lian pui pui khawih tham thil ṭha lo zawng zawng siamtu chu dan zawm loh aṭanga inṭan a ni tih hria ila, ram hmasawnna leh ram ropui siamtu chu ram pum hi dan zawma kaihhruai aṭangin a ni tih i hre bawk ang u.

- L Sailo