A VA THLAMUAN THLAK EM!

Ramri-ah kan buai leh ta. Silai nen Mizoram Police rual ramri panin an thawk chhuak rup rup mai a, trench khur laiin Position an la ṭhup mai. 

A hma ni lawkah Assam Police leh Forest rual mi za dawn lai rawn thawk chhuakin ramri hrula Mizo pa huan thlai an han ching tak tak a, Thlam an hal a, India hnam pa Mahatma Gandhi hming chuang ngei lungphun chu an sawi thluin diriam takin an sawisa bawk a nih kha. 

Sawrkar hmasa, Cong­ress kaihhruaiah khan, ram ri a Assam Police te bawk hian kan Mizo zirlai rualte leh Chanchinbu mite chu ralpui phiar a phiarin an rawn che chiam tawh a, Silai an hmet puak a, Mizo ṭhalai rualte kut thlakin thisen hial an chhuah a nih kha.

Mizoram Sawrkar, Cong­ress kaihhruai chuan zirlaite, Chanchinbu mite thlavang pawh hauh ngam ṭhaṭhum lovin, an tapchhak zawlah an lo inhrosa ve ngawt a.

Tun ṭuma Assam sawr­kar lam, an DC ho meuhva rawn thawk chhuak leh a, India mi, pawisawi lo, ei leh bara intodelh tuma hmalatute chu an rawn khuainuai a, pawisawi hlei lo India khua leh tui dik tak huan leh thlamte chu an rawn suasam leh ta hi an demawm hle. 

MNF sawrkar chuan a lo hre nghal a, hma a la nghal a ni. MP pawhin rang taka Central Sawrkar-ah zualkona thu a thawn nghal a, Mizote thlavang an hauh nghal a ni. Sawrkar chuan India rama police ṭha ber tia chhal ngam dinhmuna ding leh mek, Mizoram Police chu misualho chetna hmunah hian an tir lut rup rup mai le. 

Ram hmangaihtu dik leh hnam chhan ngam, Hnam hmangaihtu chuan, "Tharum an tih leh tha rumin," tiin ralthuam ṭha tak tak nen Pasalṭha rual a chhawp thla a, Sawrkar level lamah inbe turin DC leh a hote a tir nghal vat bawk a ni.

Term hmasa a kan ṭhalaite leh Chanchinbu mite kut lukhum a, dikna hlen chhuah tumtu, chhan­tu nei lova hliampui tuarte kha mitthla-ah an rawn lang zut zut a, hnam chhan tura thawk chhuak, hriamhrei pawh keng ve lote, silai nen meuha rawn beitu Assam Police te khan, tun ṭumah chuan an fuihpawrh Bangladesh aṭanga vaiho rawn lutte phen aṭangin an rawn bih ngam dek dek ta chauh a nih hi. 

Burma rama kawl vaiho hnuaia awm Mizote pawh him taka awm a, a ram neitu Kawl ram sawrkarin duat taka a enkawl laia mahni ram chhung ngeia Mizo-te,  India Constitution hnuaia kun ve tho, Bangladesh aṭanga India rama rawn lut vai chhe hovin hetia min rawn khuai nuai ta mai hi a mak a, a nã a ni. 

Tun ṭum buainaah hian Vai sahawkte chuan Assam Police phen aṭangin Mizo ṭhalai, ramri humhalh­tute chu, kut an thlak a, vaiho sahawkna lamah In leh dawr hial an ti kàng hial a ni. 

Chu tih lai erawh chuan Mizoram Sawrkar, MNF Party kaihhruai hian, a mipuite chhana thla­vang hauhin, IR Police ṭhahnem tak a tir a, theih tawp a chhuah nghal hi a thlamuan thlakin, a va fakawm tehlul em! 

He thil avanga Mizo mipui lungrualna chawk thova, buaina tawkte ṭanpuina tur sum leh pai ṭha hnem tak thawh khawmtu Zo fa tam takte avang hian Mizo nih a nuamin, a thlamuan thlak ṭhin. Mizoram Sawrkar pawh High level an meeting mek a, mipui tan sorkarin a tih theih apiang a ti zel bawk e. Zoram ṭang fan fan.