Dâwt hâl politics kha
MNF ṭhalaite chuan tun hnai mai khan Vanapa Hall kawtah 'Dâwt Bâwm' hâlna hun an hmang a, media hrang hrangah a darh chuai chuai a. Dâwt hâl hi Mizoram mai ni lo, khawvelah pawh thil thleng khât tak mai a nih ka ring ve ngawt mai a, mahse, Mizoramah chuan dâwt kan hâl tlat. Thil nuihzatthlak tak a nih rualin, ngaihtuah chian ngai tak a ni ve bawk.
Dâwt hal kha a haltute khan politics thilah an ṭhatpui ang nge, an chhiatpui ang tih ngaihtuah tham fe a ni. Ti ṭha an intih viau mai thei a, mahse, an target ber - mipuiah hian mark an score viau ka ring lo tlat pek a. A chhan chu, a haltute ngei kha dâwt sawi ngai lo bik an ni loin ka hre tlat pek a - chu chu Mizoram mipui tam ber hriat dan leh hmuh dan pawh a nih ka ring. Dawt an halte point hrang hrangin an thehdarh a, chumi rual chuan dawt haltute dawt sawi nia lang chu nasa taka thehdarh ve nghal a ni zui zat a!
Mizorama political party mite hian an khingpui party-te hi dâwt sawiah te, thu dik lo thehdarhahte an lo inpuh fo tawh a; dâwt sawia inpuh hi Mizoram political party-ah chuan thil thar a ni lo. Mipui pawhin an hriat hne hlei hlui tawh a ni.
Dâwt sawia an inpuhna lai tak chu a dikte pawh a awm ang a, a dik lote pawh a awm ngeiin ka ring. Political leader tu emaw an khingpui party ten dâwt sawia an puhna ṭhenkhat chu a dik ngei niin a hriat a; chutihrualin a puhtute'n an puhna thu ngei pawh dâwt leh thu dik lo a nih chang pawh a awm ngeiin a hriat.
Chutiang vel chu an ni kan political party-te hi. Dâwt sawiah an inpuh kual tawn mai mai a, an puhna thu ngei pawh dawt a nih chang a awm bawk a. Chutiang mite chuan kan ram riangte hi kaihhruai tumin ṭan an khawh nasa chu a ni si a!
Kan politician-te leh party worker tam takte rilru sûkthlêk leh chet dan en hi chuan, kan hma lam hun hi a êng lo riaute hian a hriat ṭhin. Party-te leh an mi leh sate khawsazia en hian, a êng zawnga thil thlir hi a har ve ṭhin asin. India ramah ram rorelna kenkawh te, policy siamte political party kutah a awm lo thei bawk si lo.
Kan political party te, an hruaitu te, an worker-te hi party dang beih leh sawichhiat ngawr ngawr tum lo tur leh ching lo turin ka chah ve a ni. Hetiang politics ze ṭha lo, tun hma aṭanga an lo chin ṭhin hi tunlai mite, a bikin ṭhalaite hian an ei lo, an ning, an hnê tih hriat tur. Tun hnaia inthlan eng eng emawa result chhuak tate aṭang khan insawichhiat hian mipuiah nghawng a neih tak tak lohzia hmuh chhuah ve tum teh se. Politics khelh dan hmang tihchangkan ve a hun tawh a nia.
- Lalduhmawia