MIN LIAMSAN TA SI... LALHMINGLIANA SAIAWI PUALIN

Ka pa Hminga sunna thu ziah ka tum mek laiin Mafaa Hauhnar ziah ka chhiar fuh hlauh mai a, a ti lamawm kher mai. Amah sunna thu ziaktu awm tak ang maw ka ti rilru a, awm ngei tur pawhin ka beisei bawk a. Ka mi ngaihsan, hmaichhanna ka biak fuh theih si loh Mafaa Hauhnar-in a ziak hlauh mai chu ka pa Hminga aiawhin lawmthu ka sawi e.

Khawi khawiah emaw article chhe te te ka ziah ve
ṭhin avangin thu ziak lama tuimi tih takah min tuipui em em ṭhin a. Ka pen name pawh hi a hma chuan hming dang ka hmang a, ka pa Hminga'n kan hnam hming Bawithang telh ngei ang che min tih avangin ka pen name ka thlak ta a ni. Chuti khawpa hnam hming ngaina si nang man i telh lohva ka tihin ka pu hming Saiawia ka lo telh tawh si a, a sei dawn ema ka telh ta lo a ni a ti.

Chanchinbua ka article a hmuh tawh hi chuan min phone loh leh message min thawn a, Cheri i article a chhuak e i ziak ṭha hle mai tiin min lawmpui thiamin min fak der thiam ṭhin a, ka lawm ṭhin teh asin. Leng turin min sawm a, kan pa te, kan naute nen te kan leng a, a lehkhabu ziah Thukhawchang bu te, Nukawki leh Lungrang Laiawrha te min pe a, ka lawm hle a ni.

Ka pa Hminga hi mi in ngaitlawm leh kawm nuam tak, fiamthu pawh duh ve tak hi a ni a, a rilru a zau a, a bula awm a nuamin a ngaihawm tak zet a ni. Mi lehkha thiam leh hawi sang deuh pawh a kawm thiam a, keini ang mi mawl leh mi hnuaihnung pawh kan phak tawkin min kawm thiam tho a, thu dik erawh ngaina tak a ni.

Khawi khawiah emaw thu a sawinaah Bawithang hnam kan ni a tih hi a sawi leh zauh ṭhin a, a boral zan 6/6/2016 zana Zonet chanchin thar puangtu khan Bawitlung tiin a puang palh hlauh mai kha chu pawi ka ti khawp mai.

Chanchinbuah te thu ṭha tak tak, Mizoram tana ṭha-hnemngai taka ziak ṭhintu, mi bik ram leh khawtlang hma-ngaihtu, a ni ang mi dik, mi rinawmin min muthilh san ta hi Mizoram tan channa nasa tak a ni.

- Cheri Bawithang