Dâwt bâwm hâl

MNF ṭhalai chuan ni 19. 7 24 zirtawpni khan Vanapa Hall kawtah dawt bawm an hal hluah mai a, an phur phian a, an ti ṭha ka ti khawp mai. Dawt bawm leh dawt zawng zawng, MNF sawi emaw, Congress sawi emaw, ZPM sawi emaw pawh ni se hal ral vek se, Mizoram politics-ah hian dawt bawlhhlawh hi awm tawh miah lo se ka duh a, ZPM zawng zawng pawhin kan duh dan a ni.

MNYF ten keimahni min tinzawn ngar ngara dawt bawm an hal a nih a, kan dawt sawi nia an hriatte an hal ral a nih chuan hei hi lo chhin chhiah ve se a ṭha hle ang.

Pakhatnaah chuan, dawt sawi min ti hma lutuk. An duh chuan kan intiamna anga kan awm lohna nia an hriatte chu kan term tawp dawn lamahte uar takin sawi chhuak se la, tunah chuan hei bul kan ṭan leih leih chauh va, an phur hma mah mah a ni. Lo nghak ve hram hram rawh se. Underground-a an awm lai, an independent sual pawh an hlawhtling dawn nge hlawhtling dawn lo hre lovin kum 20 zet kan nghak a. Overground-ah ram an siam ṭhat beiseiin kum 20 dawn dawhthei takin, chawm bawk, hawp bawk, pal baw bawk chunga an sorkar kan nghak leh alawm le. Keini kum khat em pawh la sorkar lo hi chu min lo la nghak hram hram thei lawm ni ka ti.

A pahnihnaah chuan, tu pa thusawi emaw apiang hi kan party thusawi ang leh kan thutiam angah MNYF hian min ngaisak suh se. Mi tin hian freedom of speech kan nei a, kan vei zawng leh duh angte chu kan sawi ve ang chu maw le.

Inthlan dawn khan kan party chuan Election Manifesto kan chhuah a, chumi mil chuan min teh zawk se la, chu pawh kan term tawp dawn lamah ti hram teh se. Tu emaw thusawi apianga min teh dawn a nih chuan kan tlin bik lo ang; tunah tak phei hi chuan sorkar hmasa kih hnawk thian reng rengin kan la buai si a.

Kan pawl hi kan lo ṭhahnem ve tawh ang reng si a, tu emaw chuan eng eng emaw, khawi khawiah emaw a lo sawi thei a, kan inveng seng bik lo. ZPM mi leh sa thusawi apianga min teh chuan kan tling thei bik lo ang, kan unau te hian zahngai teh se. Nakinah chuan kan election manifesto khan min teh se la, chu pawh term tawp dawn lamah ti lul rawh se.

MNF ṭhalaiten 'ZPM dawt sawi 100 kan hal' an tih hian dawt an sawi a ni. Dawt ni lo leh dawt la ni reng reng lo 100 an hal a ni zawk. Dawt lo 100 hal chungin, dawt lian tak pakhat an sawi a, chu chu 'Dawt 100 kan hal' an tih hi a ni. Ualau tak leh vantlang takin Vanapa Hall kawtah a tam thei ang ber inpun khawmin, a huhovin, kum 60 chhung zeta an dawt sawi tawh zawng zawng bakah dawt tharlam pakhat an va sawi belh leh mai a ni zawk e.

- K Laltluangkima,

ZPM Spokesperson