SUAL DO

Lamlian tlangdung, city heart leh hmun hulûm ualau lai vela chhun khaw-ên laia a huhoa inkawm hlim paha sual doa awm khawm hi a ṭhat rualin, heng hmuna mi awm ṭha duh lo inlar ṭhinte hian tawmbûk, inhmuhkhawmna leh inhnangfâkna, veng chhung lamah zalen taka an inhmuhkhawm theihna an nei fir fer zel a; hei hi sual bâwm bul leh sual ṭhan len zelna, sual tihzalenna bul a ni ṭhin.

Chutiang hmun chu chhun leh zan, mi náwlpui men lai chuan a reh ṭhap ṭhin a, kawngka pawh an hawng ngai meuh lo. Mahse, zan dar 12 vel aṭangin kawngka an hawng ṭan a, zing khawvar chian hma thlengin khawi khawi lam mi emaw hi khawi khawi emaw aṭang hian a hmei a pain, naupang tak tak thleng hian an lutin an inchhuah chhawk zut ṭhin a ni. Thawm an dîm ngai si lo, a bul vela mite tan a ninawm duh em em. Ninawm mai ni lovin, thil pawi leh thil bo a awm hlau reng rengin kan awm ṭhin.

A bul hnaia mite hian han ti chiam dawn ila, ṭhenawm khawveng inhmuh thiam lohna lianpui leh intihbuai hrepa inhmelmakna a thleng mai dawn si. Veng chhung hruaitute lah chu han hrilh mah ila, a bul hnaia awm, a tuartu an nih ve loh chuan eng teh vakah an ngai duh si lo. Police hnena report ngawt theih pawh chu a ni mang si lo va, hetiang in awmna bula awmte tan a hreawm duh khawp mai.

Hetiang mite hi ṭhenawm khawvengte leh mimal anga ti lovin, khawtlang leh pawl hmalaknaa thlithlai a, ven a, zilh a, action lak tur chi ni awm tak a ni.

Sual hi kan haw tak tak a, kan do tak tak a, mi awm ṭha duh lote hi kan vei tak tak a nih chuan, thil pawi lian zawk leh tam zawk, zau zawk leh nasa zawk an khawih hma leh, mi tla-hlang leh awm ṭha duh lote hi an kal thui lutuk hma hian, thil dik lo leh sual hi a nuam chin leh hahdam chin, a lera do lovin, a thim a var thlu lo va, a sur a sa hnuaia tih tak zeta mahni hrehawm pawisa lo va, sual lo chhuahna leh an zalenna hmun, sual lo ṭhan lenna hmun, hmun kilkhawr, a bulthûm aṭanga beih a ngai tak zet ta e.

- K. Hmingthankaia