Clean Mizoram movement huangah Kan restaurant te telh ve rawh se

Mizoram sorkarin tun hnaiah Clean Mizoram Movement tlangzarhin, fai hnatlang runpui neih a ni a, fai hnatlang emaw faina hapta pawh nise Mizoramah thil thar a ni lo a, kan hriat hnu, inzirtir nawn a ngai leh ṭhin zawk a ni. College ṭhenkhatin sorkar laipui hmalakna hnuaiah Swacch Bharat Abhiyan an kalpui bawk a, faina leh thianghlimna puala ka hun hman zawng zawngte kha kan media-te'n a thlalak tihchhuah an tihtawp ruala kan tawppui ve nghal a nih chuan a uihawm hle ang.

PHE department te pawhin Mizoramah total sanitation campaign a lo kalpui tawh ṭhin a, India ram state dangte thlirin faina huangah kan dinhmun a chhe ber lo a, mahse hei vang hian kut kuangkuaha ding reng thei erawh kan ni lo.

Fai beihpui kan thlakin kan rilrua lang hmasa ber chu khawlai phiah fai te a ni ṭhin a, kan sorkarin Clean Mizoram Movement hi engtin nge a kalpui zel dawn tih kan hre lo. Hetihlai hian fai beihpui hi kan la kalpui zel dawn a nih chuan kan restaurant leh hotel-a kan ei siam dan te pawh hi faina movement huangah telh se a duhawm khawp ang.

Nikum September 9-a Vanglaini chanchinbuin a lo tarlan tawh angin, Health Services department-a Food & Drugs Administration-in 'Food Safety and Standards (Licensing and Registration of Food Business) Regulations 2011' tlawhchhana Aizawl veng hrang hranga restaurant 68 leh chhang siamna (bakery) a endiknaah thianghlim tehna hrang hrang paltlang an awm lo a nih kha! He thil hi a Kristian loh bakah kan inhmeh lo.

Aizawl khawpuia kan restaurant te zingah hian ei tur thianghlim mai ni loin restaurant a chawlte kut silna nei zawng ila kut thliaka chhiar tham lek an awm a rinawm. Hei hi kan dinhmun a nih vangin ei leh in sawngbawl dan thianghlimna te pawh Clean Mizoram Movement huangah dah a ṭul hle a, ei leh in thianghlim lo mipuite'n kan hnawl a hun ta.

Khawvela changkang an tehna pakhat chu food habits hi a ni e an ti ṭhin a, chaw ei dan leh ei siam dan hi hnam changkang leh changkang lo tehna niin an sawi. Mizoramah ngei pawh hian officer hnathawh inang chinah pawh an chokaa an chet dan hi changkang leh changkang lo tehna a tling ve tlat a ni. Hemi kawngah hi chuan Mizoram pumpui hi kan harh thar a ngai a, tunah hi chuan kan ei leh in siam dan hrim hrim pawh hi a la hmanlaiin a la changkang lo ka ti. Kan traditional style hi ka hmusit lam a ni lova, kan ramin hma kan sawn hnua kan ei leh in siam dan (traditional style ni tawh lo) hi a la changkang lo a, a la thianghlim lo.

Kan chawhmeh zawrh dan hrim hrim pawh hi ennawn theih ka duh ṭhin. Khawlaiah kan han zuar tawp mai a, Aizawlahte phei chuan kawngpui kamah an zuar. Kawngpuia vaivut khu tinrengin a bawh bakah motor khu chhuak zawng zawng kha kan thil zawrhah khan a khu phei a, chu chu kan han ei leh nghal ṭhin a, kan hriselna pawhin a tuar. Kan ei leh in zawrhna pawh hi Clean Mizoram hian huam se ka duh khawp mai.

Kan khawlai leh kawt­thlerte fai viau mah se kan ei leh in siamna hmunte a fai si loh chuan fai movement hi engmah lo mai a ni ang. Fai kan tum chhan chu hriselna a nih si chuan kan hriselna atan kan ei leh in pawh a thianghlim a ngai a, kan sawnbawl dan pawh a thianghlim a ngai a ni.

Health department hian hemi kawngah hian chak zawkin hma la zel se a duhawm hle a, PHE leh department dangte nen pawh a ṭul chuan ṭangrual rawh se. Restaurant leh hotel mai ni lo, chaw hmeh zawrhna hmun te leh an sawngbawl dan te pawh Clean Mizoram Movement nen an inmil em tih thlengin enfiah ni rawh se. Ei siam thianghlim lo leh a hmun thianghlim lo hi a hnam anga mualphopui theih a ni e.