Private school sumdawnna hi
Mizorama private school dintu zingah hian rawngbawlna aia sumdawnna rilru pu an tam zawk ang tih hi chu 'ka kutphah' tih tlukin ka chiang ve tlat a, private school-te sumdawnaah pawh a zavaia sawi lovin kei chuan an school hmun leh classroom chauh hi ka sawi duh a ni.
Private school tam zawk hian anmahniin hmunhma an nei loa, mi in luaha khawsa an niin ka ring. Hei vang hian classroom chêp leh tawt em em maiah naupang an êk beng ṭhin. An tawt hi chu ka la hrethiam a, classroom pawna infiamna hmunhma pakhat pawh awm lova an dah hi chu kei ka vei khawp mai. Hei hi School Education Department leh MZP pawhin an vei tur a ni a, tunah hi chuan school fee kan chawi ṭeuh ṭeuh a, kan fate chu in luah man tlawm lo an ûm avangin hmun rem lo deuhah an dah a, kan sawisel ngam si lova, nu leh pa leh zirlaite hi kan khawngaihthlak a ni.
Ṭum khat chu Aizawla English medium school hlun leh lian ber pawl hi ka tlawh a, ka thil hmuhte chuan min barakhaih hle a ni. Naupang classroom chu pûk chhung a ang berin ka hriaa, a chêp si a, classroom-a class an late chu a lehlam aṭangin a hriat theih a, kawt zawl an nei lova, inthiarna a thianghlim lova, a hrehawm hle a ni. Ka ngaih pawimawh ber chu a him lo (safe lo) lutuk kha a ni. kangmei chhuak se chhuahna tur (exit) pawh a mumal lova, lirnghingah pawh a hlauhawm em em bawk si. School Education Department leh Disaster Management Department lam pawh hian hengte hi vei ve se, a hmunah endik se, school him lo hi chu insawntir rawh se. Tuna ka han thlan chhuah bik school hi chu a neitu an hausa em em a, an zirlaite awmna hmun thawl pawh an pe thei tur a ni a, hei hi chu exploitation lam rawngkai zawk a ni.
"An duh loh leh lut lo mai se," tih rilru an put ka ring a, "Kan school awmna tur hmun chu kan thu thu," an tih pawh ka ring a, mahse an ngaihtuah tur chu mipui rawngbawltu an ni tel a, sumdawnna ringawt nen school hi enkawl lo se, private English medium school building chhe lutuk hi sorkar tal pawh hian eng tin emaw a tih a ngai a ni. He mi kawngah chuan KV School-te hi an fakawm a, tuna an khar tak Special Boarding School, Tanhrila mite kha chuan vision an lo neiin ka hria. Tunah chuan fee to si, building chhe si chhungah kan fate an kala ka lainat em a ni.