Damdawi zuar hausakna ram Mizoram

Ruihhlo zuar hi chu America khaw­mualpui pahnihahte khuan an hausa thur thur ṭhin a, damdawi (medicine) zuar hausak thur thurna chu Mizoram lo hi chu sawi tur kei mimawl hian ka hre lo.

Damdawi zawrh hi a hlawk a nih ka rinna chu mipui nuai 10 vel awmna state-a damdawi dawr tam dan en hian a ni. Khawpui lianah ka kal ve zauh zauh a, damdawi zawrhna hi a lane lane-a a awmna hi chu damdawi in bulah bak ka hmu ve lova, chutah pawh an tam lutuk ngai lo.

Mizoramah hi chuan Aizawla damdawi dawr awm chinte hi han chhût vang vang hian a tam mah mah a ni, kan hrisel lo bik nge ni tih pawh kei chuan ka hre ve thiam lo.

Damdawi an zawrh vanga an hausa em em mai hi ka ngaih a ṭha thei tlat lo. Thawmhnaw dawrte, hardware dawrte chu lo hausa pawh ni se an duh zat zat chhiarin an hlep tam thei a, a mak pawh ka ti lova, mahse mak ka tih chu damdawiah printed price a inziak vek a, chumi zat vek chuan an hralh si a, damdawi zuar tawh phawt hi chu an khawsa thei a, tam tak chu hmuh theihin an hausa thur thur mai mawle!

Mipui nawlpuiin kan la hriatpui loh zawk phei chu damdawi hi a zuar ni lo hian a supply-tu an la awm leh cheu a. Thingtlangahte an kal kual a, anni hi an han hlawk leh em em khawp a, damdawi hi a hlep a ṭha a nih dawn hi han ti ila, hlep ṭeuh turin kan chawmte hi mipui nuai 10 vel chiah a ni bawk si a, chu chu Kolkata-a veng pakhat ang vel kan ni. Kolkata-a veng pakhata damdawi dawr tlemzia kan hre bawk si a, ka ngaihtuahna a buai mup mup.

Ni e, kei chuan ka hriatthiam loh avangin ka hriat loh thilte ka sawia ka buai ta a ni. Damdawi zawrh hi sumdawnna hlawk tak ni ta se, state danga mi liante hi damdawi zuar nih ve awm tak a ni a, an ni bawk si lo. Mizorama damdawi zuarte hian state dangte hriat loh thil hriat an nei a nih ka ring a, chu chu min hrilh thei in awm chuan ka mak tih hi a reh huai ang.

Doctor te leh Engineer-te aiin in leh car an nei ṭha tawh zawk an tih pawh hi a tak a nih ka ring ta tawlh tawlh a, hengte pawh hi a chik miten rawn sawifiah se.