Ration card-a hming lang leh population inmil lo

Directorate of Economics and Statistics-in tun hnaia Statistical Year Book 2014 a tihchhuahah Mizoram mihring awm zat aiin ration card-a hming chuang a tam zawk a nih kha.

Kum 2011 chhiar­puiah mihring 10,97,206 kan awm a, kum 2013-14 chhunga ration card 2,65,473 awma hming chuang zat erawh 15,43,180 a ni. He thil hian online-ah titi a titam nghal hle. Kan chanchin chhe lam chauh ngaihven ṭhin vai ho buaipui peih zawng leh hriat chak a nih avangin phai chanchinbute pawhin a ziak rang hle.

He thil hi mipuiin eiruk kan tum vang bik hrim hrima inmil lo a nih a rinawm lo a, ration card kan update ṭhat loh vang zawk niin a lang. Mitthi tawh leh awmpui hluite emaw, card kan siam laia kan chhungkuaa chengte hming kan paihtir ṭhin lo a, paih kher loa buhfai kan khulh theih tho si vang tein hming paihtir a ṭulna kan hre lo a ni.

Sorkarin paih tur ti se, hun hawng se mipui chuan dik taka tih kan duh vek a rinawm. India ramah hian Mizoram mipuite tluka sorkar thuawih an tam lovang.

Hming inmil lo siamṭhat nan kar khat vel emaw lek sorkarin beihpui thlak se, YMA aurinna kaltlangin puang se mipuiin kan zawm lohna tur chhan a awm lo a, mahse khauh takin kalpui ni rawh se.

Retailer te hian hming belh leh paih theihna an nei loh a nih chuan inrelbawl awlsam nan thuneihna pe bawk se la chu chuan hma lam hunah awmze thui tak a nei bawk ang.

Sum leh paia harsatna tawk mek state sorkar hian inrenchem policy a kalpuinaah he thil bawhzui hi a tihmakmawh a ni. Sum tam tak a hum theih phah ngei ang.

Puitling la ni lo puitling anga kum ziah te pawh tihdik nghal ni rawh se. A tul chuan a finfiahna atan voters id emaw birth certificate pawh a dil mai tur a ni.