High Security Registration Plate

Kan hriat ṭheuh angin Mizoram sawrkar transport department chuan Supreme Court thuchhuah behchhanin kum 2012 April aṭangin High Security Registration Plate (HSRP) chu Mizoramah lirthei awm zawng zawnga vuah vek turin hma a la ṭan a. A tir aṭang rengin lirthei neitu tam tak an phun a, Mizoram sawrkar pawhin mipui min nawr vut vut lem lo a, kum 2013 chhoah phei chuan HSRP thawm a reh hle. NLUP thawm erawh a na a, NLUP ṭha mi te an ti a, kum 2013 chawhnu lamah phei chuan Chief Minister Special Package NLUP te hial an sem a. Kha CM Special Package NLUP kha kum 2018 chho a sem turin an dah ṭha ta ni maw, a thawm hriat zui tur a awm ta lo.

Kum 2013 MLA inthlan a zo a, Congress bawk an lo sawrkar leh a. Mizoram sawrkar chuan December ni 9, 2013 ah (Memo No. D.26020/8/10 TRP)ah thuchhuah siamin motor hlui leh thar zawng zawngah vuah vek tur leh Supreme Court thu angin April ni 31.2014 ah chuan vuah fel vek tawh turin thuchhuah a siam leh a. Hemi avang hian motor hlui neitu tam tak pawhin an motor-ah HSRP hi an vuah tir a. Motor hlui neitu tam takin an motor-ah HSRP hi an vuah hman dawn loa a lan avangin January ni 29, 2014 (Memo No. D. 26020/8/10-TRP/Pt-II) ah thuchhuah siam ṭha lehin, motor hlui a vuah theih hun chhung a rawn pawtsei leh a ni. Hetiang taka sawrkar ber a khauh takah chuan lirthei neitu tam takte’n an lirtheiah vuah an tum avangin trasport department an lun em em a, zing aṭanga tlai thlengin an inpangaw inzial a ni ber - Inrinni leh office chawlhah pawh HSRP titu company-te chu chawl loa hnathawk tura tih an ni.

HSRP vuah tur hian M/S Shimnit Utsch India Pvt. Ltd. Mumbai chu Mizoram sawrkarin a thlang a. Anni hian April ni 27, 2012 aṭangin Aizawl District bikah vuah hna an ṭan a, District danga HSRP an hman ṭanna chu Lunglei-ah Nov. ni 11, 2012; Saiha-ah, Dec. ni 6, 2012; Champhaiah Dec. ni 3, 2012; Kolasibah Dec, ni 6, 2012; Serchhipah Dec ni 6, 2012; Lawngtlaiah June ni 16, 2013 leh Mamitah July ni 4, 2013 ah te a ni. HSRP vuah man aṭang a sum hmuh za zela pathum (3%) hi sawrkar revenue a lut a ni a. Nikum October thla thlenga lirthei hlui leh thar an vuah aṭanga sawrkarin revenue a hmuh tawh chu Rs. 8,09,998/- a tling tawh a ni.

Sawrkarin thuchhuah vawi tam a siam hnuah leh lirthei hlui neitu tam takten sawrkar thupek zawma an lirthei a number plate ṭha laite pawtthlaa HSRP an vuah tir mek laiin kum 2015 a lo inher chhuak a, January ni 16, 2015 khan Congress Bhavan-ah Tranport Minister Pu John Rotluangliana chuan HSRP chungchang sawiin, motor hlui la vuah loten an vuah ngei ngei sawrkarin a phut luih loh thu a sawi ta phut a, lirthei neitu tam tak thin a ṭhawng hle.

HSRP chungchanga inhnialna tawp thei lo chu Minister thusawi hian a rawn vaw nung leh ta a. A tira lirthei neitu zawng zawngten an vuah vek tura tih ni si, Minister berin awlsam taka a rawn ṭhiat/sawi hnawm leh ta si hi ngawih bo pui a harsa khawp ang. HSRP hi ṭul loa sum chawi thlawnnaah ngai an lo awm a nih pawn thiam loh ngawt chi a ni lo ang. HSRP vuah man hi private rate aiin a sang ropui si a. Sum a lo thlawna senga inngai tan chuan tha a na duh ngawt ang le.

Vanglaini Jan ni 27, 2015 chhuakah chuan lirthei hlui aṭanga sum hmuh tawh sawrkara lut leh company a mi zawng zawng belhkhawm hi Rs. 12,499,123.35 zet a tlin tawh thu tarlan a ni. Transport Minister sawi ang khi a nih chuan heti zat sum hi lirthei hlui neitu zawng zawngten ṭul loa an sum an senthlawn zah a ni tihna a ni a, sawrkar hian mipui hnenah ngaihdam a dil tur nge ni ang a, mipui te hian kan en liam leh mai mai zawk dawn?

Mi tam takin HSRP atana plate kan hman hi a chhiatzia te, ṭangkai loa kan hriatna te kan sawi fo a. Amaherawhchu, RTI hmanga sawrkarin a chhannaah chuan, “A plate an hman chungchangah hian sawrkarin ṭha a ti nge ti lo tih thuah tun thlengin ziakin mipui aṭangin complain dawn a awm loh avangin a ṭhat leh ṭhat loh sawi theih niin a lang lo,” tia chhan a ni. Sawrkar chhanna aṭang khian lirthei neitute hian engnge an mawhphurna awm ve tih erawh lo enfiah se a duhawm hle.