Bungraw Sem Motor Khap Kha Ka Thlawp

Aizawl khawpui chep tak karah dawr hrang hrang mamawh bungrua sem motor-in bungrua an pe ṭhin a, an duh duh hunah bungrua an pekna dawr kawtah dingin an bungrua an unload ṭhin. Chu chuan traffic a tih-jam fo avangin tun hnai mai khan Traffic Sr. SP chuan bungraw unload hun an bituk ta a, hei hi zawm pawh a hlawh ngei a rinawm a, a thlawpawm hle a ni.

Aizawl khawpui hi kawng hrang hrangin enkawl a ngai hle a, a bikin lirthei thununtu traffic police pawh theihtawpin ṭan an la a, an la zel turah ngai bawk ila. Dawr bungraw pek (unload) hun bituk a ni ta hi a lawmawm hle mai. Bungraw sem motor hian an nawm an makin an bungraw pekna tur dawr kawtah an ding mawp mai a, traffic an ti-jam em tih pawh ngaihtuah loin an bungruate chu an unload ta ṭhin a, a ṭhen an rei a, a ṭhen an rei lo bawk.

Bungrua an phurh an unload hian eng emaw takah an inngai emaw ni, tu mitmei mah an veng ngaih miah lo. An dikna ber emaw ti an angin a lang ber. Lirthei reng reng dinna (parking) a awm a, dropping zone a awm bawk a. Dropping zone ah chuan minute 10/20 han din ngai a awm chang pawhin traffic police-te pawhin an hrethiam em em ṭhin. Chutiang ni loa traffic tawt em em mai lai pawha an bungraw phurhte an pekna tur dawr kawt kherah an unload hian mihring/mi dang dikna leh chanvo a lakska tih hi, heng bungraw phurh lirthei khalhtute hian an hriat ve a ngai khawp mai.

Traffic Sr. SP-in ngun taka a thlir a, mipui tana harsatna thleng lo thei ang ber si, bungraw phur tan pawha harsa lo thei ang berin a hunbi a tuk hi a ṭha hle a ni. Dik tak chuan khawpui tihrehawmtu ber chu lirthei hrang hrang khalhtute hi kan ni a, kan polite viau chuan mipui tan pawh a nuam a, lirthei khalhtute tan vek pawh a nuam em em a ni. Horn pek lohna khawpui han nih ringawt maite hi a hlu a, phaia han zin changa ri bengchheng ang kha kan nei ve ngai lo ringawt pawh hi state dangte tana entawntlak a ni ngawt mai.

Chuvangin Traffic Sr. SP thuchhuah, bungaw sem kual nana peak hours lai ni tin dar 8:30 aṭanga dar 11 leh tlai dar 3-6 chhung bungraw unload khapna a bituk hi khauh takin kalpui ni se a ṭha hle ang. Bungraw semtute pawhin an hriatthiam pawh a ṭul hle a ni.

- Lal Rinmawia