PHE an fakawm e
Mizo mipuite hi sorkar laka kan rilru put dan hi a dik tawh lo laklawh niin a lang. Sorkar aṭangin thil ṭha tam tak kan dawng a, beisei loh takin kan dawn tur ang dawn loh te pawh kan nei ve tho ang.
Amaherawhchu, thil dik lo tam tak kan sawisel a, kan do hi a ṭhat viau laiin thil ṭha tak tak kan dawnte chungah hian lawmna chang erawh kan hre lem lo khawp niin a lang.
Entirnan sorkarin state dang aṭangin electric power te, buhfai te a man pangngaiin a lei a. Tichuan, a man tlawm zawkin mipuite hnenah a pe chhawng ve leh a, sorkar hian hetiang kar tin, kum tin a tih hian pawisa tam tak a hloh a, mipuiten a man tlawmin kan lo neih theih phah thung a, lawm nachang erawh kan hre lem lo.
Kan ta tur ngei, kan chanvo tur dik tak pawh ni se, kan chunga thil ṭha eng emaw sorkarin emaw midang tu pawhin rawn ti se lawm nachang i hria ang u ka tihna a ni. Tu pawh sorkar se hei hi chu kan dawn tur tho tho a nia, tia lawm nachang hre lo rilru hi a ṭha ka ti lo a ni ber mai.
PHE department pawhin lui lian aṭangin mipui mamawh tui a pump a. Chu tui chu ei tlakin a tithianghlim leh a. Tichuan, mipui hnenah ei tlakin a sem chhuak a, tui man pawh hi a tlawm hle a ni. Tui pipe a chhiatin ruahsur, nisa leh zan pawh sawi loin mipui tan an thawk ngar ngar a, mah se mipui kam chhuak aṭangin lawmna emaw han fakna lam hi an dawng khat hle niin a lang.
PHE tui sem man tlawm dan i hriat duh chuan hetiang hian kan sawi thei ang. Private aṭangin tui litre 800 chauh pawh lei la, Rs.1500 vela i lei a ngai ang a, chu pawh chu khawi lai kawmkar a mi nge tih pawh hriat a ni lo.
Chutihlaiin PHE aṭanga tui thianghlim litre 6000 vel Rs. 200 a lei chu na lo tak a ni.
Sorkar hian tih dik loh tam tak a lo nei pawh a ni thei a. Chutianga a tih dik lohte chu hai chhuak ila, a chhan zawt zel bawk ila kan ram tan hna ṭha tak kan thawk tihna a ni ang a, kan hruaitute leh thil dik lo titute pawh an inkiltawih phah ang a, hlemhletna kan nek chep tihna a ni.
Kan hriat atana ka duh chu sorkar a ni emaw mimal leh eng pawl pawh ni rawh se, thil ṭha titute hi mipuite hian kan chawimawiin kan fak hreh tur a ni lo. Tichuan, phurna nasa zawk kan siam sak ang a, thil ṭha tih hi kan intihhmuh ve zel mai dawn a ni.