Private school building chhia ka vei
Hman niah tun hma aṭanga ka vei tawh leh titi nikhua pawha ka sawi chhuah fo ṭhin Mizorama private school building chhe lutuk an rawn sawi chhuak kha ka tuihnih duh. Hei hi sorkar lamin a enfiah vat loh chuan lirnghing leh kangmei chhuak palh se kan fate hi an sikul luhna hmunah hian kan chân nasa dawn si a, thuneitute cho chhuah tumna turin ka han ziak dawn a ni.
Keia ziah ve hi chu an school hming ka tarlang dawn lova, mah se school panga vel ka hriat chian aṭanga ka thlirna a ni. Private school-ah hian luh kan inchuh tawh a, school ṭha deuh nia kan hriatte phei chu kan intlawnsiak a ni. Private school ṭha neitute tluka biak harsa hi an awm lo mai awm mang e tiin ka sawi ṭhin a, Minister-te hi chu mipui tihlungawi loh hlau an nih vangin biak an la nuam deuh zawk a, private school ṭha neitute hi chuan tumah an chungah an leng lo tih hi an han hre chiang em em a, an tûm bûr mai niin ka hmu ṭhin a ni.
Ka sawi tum tak chu heng private school neitute hi mi hausa an ni. School ṭhenkhat hi chu ding tir te a la ni a, naupang pawh nei tlem an ni a, loan laa bul ṭante an ni ve a, an la hausa lo. Private school tam tak hi chu an hausa a, Mizoram ang sumdawnna a len lohna state-ah hi chuan mi hausa an tling pha chiang a ni.
Heng mi hausate hian kan school fee pek khawm an hausakpui a, an building min pek hi chu lungawina chi a ni lo.
Pawisa nei ṭeuh mah se khawilai building remchang emaw an luah a, infiamna kawt zawl pawh kan fate an pe lo. Kan pan lo thei si lova kan sawisel ngam lo mai mai a ni. Kangmei chhuak se tlan chhuahna pawh awm lo a ni ṭhin a, lirnghing ta thut se kan fate chan hian maian chan pawh a tluk awm lo asin.
Heng building chhe taka khung khawmtute hian pawisa an nei a, kan fate awmna tur school building ṭha erawh min sak sak duh si lo. Hei hi MZP-te pawh hian vei se, zirlai pawl an ni anga an tih tur niin ka hria.
Private school building chhe lutuk leh him lo lutuk hi chu kei ka veina a rei tawh a, miin an sawi chhuah takah chuan thiam lo takin ka tui hnih ve a ni.