KOHHRAN UPA RETREAT

Retreat kan ti tak nâ chu, kohhran upa conference ang pawhin a sawi theih ang chu. Rawngbawltute hi tu mah famkim bik awm lo, intuaithar ngai vek kan ni a, mahse, infuih tharna pui tham tak nei ngai lo chu kohhran hnarkaitu ber kohhran upate hi an ni thei mai ang em?

Pastor hian mihring famkim kan nih lohzia leh infuih thar ngai kan nihzia hriain, tun hma daih tawh khan pastor retreat an lo hmang tawh ṭhin. Presbyterian Kohhran chuan kum khat danah intuaitharna an nei ziah a, hlâwk an ti a ni ang, tun thleng pawhin an la chhunzawm. Baptist Kohhran hian intuaitharna ti chiah lo mah se, pastor conference an hmang ṭhin.

Sum hlawh/dawng ṭhin tho Synod revival speaker-te pawh intuaitharna hun siamsak an ni ṭhin a, speaker mai bakah an ṭhuihruaite (counsellor) pawh an intuaitharnaah an tel ṭhin a, chhimtu pawh an ṭhahnem thei hle.

Kohhran upate hi a hranpaa Pathian thu zir ni mah suh se, inpekna avanga rawngbawltu an nihna hian nasa takin a khalh kal a, mi inzirmi phei chu Pathian thu zirte ang maiin Pathian thu thiam tak tak pawh an tam.

Chutiang a nih rual chuan, inpekna a lo tlakhniam deuh hian kohhran upa tam tak chuan Pathian thu zir leh chîk lam aiin khawtlanga mi challang leh hotu deuh nihna anga ngaia kohhran tana ṭhahnemngai hman ta vak lo leh ṭhahnemngai ta lo hrim hrimte pawh an kat nuk awm e. A tam zawk hi pastor aiin an hah zawk mah a, a chhan chu mahni hna an thawh kar lakah khawtlang leh kohhran tan an hun tam tak an sêng ṭhin. Chhun lamah kohhran upate chuan mimal hna an thawk a, zanah leh zingah, tlaiahte pawh hah sawi hleithei lovin upa bial fan, mitthi râl, damlo tlawh, komiti leh thil dang tam tak an kawp tel a ni. An hnathawh leh inpekna hi pastor ai mahin a nasa zawkin a hahthlak zawk a ni. Mahse, lawmman (dearness allowance emaw) an phût ve ngai lo va, khawvel thila hlâwkna an beisei ve ngai hek lo tih theih a ni ang. An hun awlah chutiang rawngbawl hna chu thawk ni se chuan an chhuanawmna vak a awm bik lo mai thei, mahse, an mimal leh chhungkaw tih tur pawimawh tlansan a ngaih chang a tam zawk ngei mai.

In veng/khuaa kohhran upa fel tak kha a ni tin hun hman dan han chhûtsak chhin teh, a namailo hle a nia. Pastor hna zawng zawng deuh thawah hian kohhran upate an chet ve zel a ngai si a, a chang chuan pastor tel lo pawha kohhran thil tih pawimawh an kalpui lawp lawp a ngaih chang a tam.

Chutianga hah taka thawk rim ṭhin kohhran upate tana intuaitharna emaw, khawmpui emawte a awm ve lo hi chu kohhran hian a ngaihtuah chian loh vang a ni thei ang em? A mamawh ber ni zawk awm tak, hah taka an hna thawh faksak te, infuihthar an ngaih nasat laia infuihtharna hun siam sakte hi a ṭul viau lo maw?

Intawhkhawmna lian tham kohhran upa conference te hi awm thei se, kohhran hrang hranga upate'n an harsatna han inhrilhtawn thei se, an hah tam tak a chhawk huai huai ang a, kohhran pawh hi a chak thar zawk lo'ng maw? Eng nge i ngaihdan ni ve le?

- Kima Mivam