Govt. M/S Chhiahtlang compound chungchang

Vanglaini Dt. 30.1.2015 issue-a Pu R. Zomuana, Teacher Rtd.&Ex-VCP Chhiah­tlangin Govt. M/S Chhiahtlang compound chung chang a rawn ziak kha, khawchhung mite tan chuan sawi fiah leh chuan ngai lo mah se, Vanglaini hi khawvel deng chhuak chanchinbu a nih avangin Zoram mipui hriatah thu dik puan chhuah ṭha kan ti a ni.

He school hi kum 1967-ah Chhiahtlang ding ṭanin Pu R. Zomuana hi 1968 May 27-ah Assamese Tea­cher ni turin Baktawng aṭanga rawn transfer a ni a. 1981 kum tawp lam thleng he school-ah hian thawkin a pension hmain boruak engemaw avangin Saitualah transfer a ni.

He school hmun hi V/C pass neiin 1969 ah luah ṭan a ni a, school sak a nih hian tuna school kawt zawl hi a la awm lo a. School naupangten an laih ṭhin bakah Pu R. Vanneia, khatih laia A.O khan Tam inhlawh nan a laihtir bawk. School building hmasa ber pawh tuna field ni taah hian sak a ni a, a hnuah tuna a dinna hmunah hian zawl duhthawhna avangin tawlh phei a ni.

Kum 1988 ah Pu K. Lalruna, khatih laia Headmaster te, Bialtu CEO leh V/C te remtihnain Revenue Department-in Patta turin an teh a. Hemi ṭum hian "Patta theihna Thutiam" pawh ziah niin vawiin thleng hian en theihin a la awm. Revenue Dept.-ah V/C pass hi thehluh a ni a, kum 1990-ah V/C pass thar siam leh a ni a, Land Lease pawh siam a ni.

YMA leh KṬP ten thil tihkhawmna an nei lo anga a sawi pawh hi, school field awmtirh aṭanga vawiin thleng hian vantlang leh mi­malin an mamawh chuan Headmaster rem­tihnain hman reng a ni a, harsatna a awm lo.

Kum 2013 April-ah UD & PA Department aṭangin Community Centre sakna tur Work Order Pu Sap­thlengliana, Zarkawt, Aizawl hminga tih­chhuah a ni a. Chumi chu Chhiahtlanga sak tur niin a satu tur chu Pu C. Lalrawna a ni.

He Centre sakna hmun atan hian school compound hman tum a ni a, Education Department lamin school field-a Hall/ Centre sak phal loin hun engemaw chen innawr buai a ni.

Education Depart­ment-a Land and Building Protection Committee ten hma lain 21.1.2014-ah Serchhip D.C Pi Juhi Mukherjee IAS hoin meeting neih a ni. Hemi ni hian V/C member leh De­partment lam hotuten agree­ment an siam a, hall sakna turin school kawt zawl sir sahthlak a ni a, a bak zawng school ram chu Land Lease a siam zui a ni ta a ni.

Thu dik hre duh chuan school docu­ment leh record felfai tak school office-ah emaw Education Department-ah en theih reng a ni.