Ui a awm, fimkhur rawh...

Thu neitute chuan "Ui a awm, fimkhur rawh" tih thu hi ui vulh zawng zawng te, an ina tar turin thu an chhuah a, thil ṭha tak a ni a, ui neitute paw'n an zawm ṭha khawpin a lang.

Amaherawhchu, ui vulhtute hian he thu hi tarin inleng leh midang lakah ui an khuahkhirhna kawngah an duhtawk mai ang tih a hlauhawm. Kan hlauh zawng leh ngainat zawng a inang lo a, ui pawh hi mi tam tak tak tan ṭhian ṭha an ni a, ṭhenkhat chawhmeh tui ber a ni thung. Tin, mi tam tak tan hlauhawm a ni.

Ui sa duh hi sual an ni lo ngawt a, ui hlauh hi thil zahthlak a ni hek lo. Amaherawhchu, ui hlau ve lo leh hmangaih em emtute hnena an hmangaih em em hlau nih kha thil nuam lo a ni thung.

Chuvangin ui neitute hian an ui vulhte an khuahkhirh a ngai; hlimna thlentu an ui hi midang tan chuan harsatna thlentu a ni thei. "Ui a awm, fimkhur rawh" tih tara duhtawk mai hi a tawk lo.

Inlengte awm tinuam lo khawpa kan ui vulhin inlengte a chhaih a, a tihbuai chuan ui vulhtute tan mualphona a ni a, midang tana harsatna siam hi hawihhawm lo nihna a ni. Mizo, midangte tana malsawmna ni ṭhin tan chuan a inhmeh lo a, kristianna nen paw'n a inmil lo a ni.

Chutihlai chuan, inleng an neih a, 'Ui a awm, fimkhur rawh,' tih an tar avanga duhtawk mai loa an ui vulhte lo senghawi a, lo thiar fihlim zung zung ṭhinte erawh chu an zahawmin, an ui vulh thlengin an tizahawm tihna a ni. An ui vulh an hmangaihzia an tilang tihna a ni a, midang tana malsawmna an ni tihna a ni bawk.

"Ui a awm, fimkhur rawh" tih tar hi kan duhtawk a, inlengte laka kan ui vulhte kan fimkhur leh si loh chuan, he thu ṭha tak tar hi inlengte rikraptu a ni ringawt.

Tin, miin min tlawh serh phah ang nga a, min tlawh paw'n hreh tak chungin min tlawh dawn a ni. Midangte fimkhur tura hriattirna kan tar ringawta keimahni kan fimkhur ve si loh chuan a dik lo a ni.

Kan sual leh mawl em em vang pawh ni loin hriat lohna hian mihring chu min ti â thei a, chu chuan mihringte kan famkim lohzia leh kan inan lohzia a tilang a ni.

Chuvang chuan thil hote anga langah pawh hian infinchhuah zel kan ngai a, ui vulhtute paw'n an hriattirna tar hmanga midang fimkhur tura tih hi duhtawk mai loin anmahni ngei pawh fimkhur se a lawmawm ngawt ang.