I FIT EM?

India ram pumpui puitling zatve zet hi an fit tawk lo tiin The Lancet Global Health report chuan a tarlang. WHO-in mihring hrisel nana chet velna (physical activity) kan mamawh tawk a tih (recommended physical activity) hi kan pha lo tihna a nih chu.

Khawvel ram hrang hrang 195 zingah India ram hi hriselna atana chet vel tam loh dan tehnaah 12-na a ni pha hial a; che vel tlem ram kan ni tihna a nih ber chu.

Hetiang zela kan kal chhoh chuan kum 2030-ah chuan mipui 60% vel hi fit lo kan ni dawn a. Chuvang chuan natna chi hrang hrang - lung natna/heart attack, stroke, zunthlum, thisen sang, alzheimer leh cancer-te kan vei hma sawt dawn tihna a lo ni.

WHO chuan kar khat chhungin minute 150-300 tal exer (moderate aerobic activity) la turin min duh a. Ni tin minute 30-45 tal exer lak tur a ni. Zing lama exer la hman lo tan pawh tlai lamah emaw, mahni remchan hun hunah lak mai tur a ni.

ALZHEIMER'S DISEASE

Rih lutuk (obesity) leh meizûk hi Alzheimer natna thlentu langsar (key trigger) a ni. Alzheimer chu thluak natna benvawn, zawi zawia zual lam pan zel ṭhin hi a ni a; hriatna hloh, awm dan phung hriat lohna, rilru fîm hman theih lohna, ni tin hna leh tih tur tih theih lohnate a thlen a, harsatna nasa tak anmahni leh chhungte tan a thlen ṭhin.

Meizûk hian thisen zâm a tichhia a, chu chuan thluaka thisen supply a titlem a, thluakin thisen duh tâwk a hmuh loh chuan thluak timûr (brain cells) an lo chhe ta ṭhin a ni. Thau lutukna pawh hian kan taksaah insulin hnathawh a tibuai a, insulin resistance a siam a, chu chuan thluak a tichhe thei bawk. Heng avangte hian Alzheimer natna a thlen hma phah a ni.

The Lancet Medical Journal chuan hriatna hloh leh rilru fim hmang thei loa awmphung hloh natnate hi kum 2050-ah chuan a let thumin a pung dawn a ni tiin a sawi.

Thau lutuk pawh hian zunthlum leh lung natnate a thlen thei a, heng hi Alzheimer awm hmatirtu an ni bawk. Heng hian kan thluak hriselna an tichhia a, thluaka thisen zamte tichhiain hriatnate a hlohtir a, Alzheimer a thlen ta ṭhin a ni.

Meizial aṭanga a túr insiam 'nicotine leh tar' te hian thisen zâm an tichhe thei a, kan taksa pêng pawimawhte'n thisen an dawn tlem phah a, chu chuan Alzheimer leh hriatna hloh natna dang tam tak a thlen hmatir thei.

Chuvangin, heng natna lak aṭanga kan fihlim theih nan, nunphung dika kan nun a, ei leh in a tawk chauha ei a, taksa sawizawi hi kan tih ngei ngei tur a ni. Meizial zu ṭhin chuan sim a, a la zu ngai lo chuan tih miah loh tur. Tichuan, mithiamte'n pung zel tura an sawi Alzheimer natna kan pumpelh theih ang. Kan lo hriselin Pathian leh a kohhran tan te, khawtlâng leh kan chhungkaw tante hrisel takin rei tak kan ṭangkai thei dawn a ni.

- Dr J Lalramchhuanga,  MD