PHARMACY ATAN PHARMACIST

Mizoram hian damdawi sumdawnna, dan leh dan lo anga sumdawnnaahte hian hmalakna tur tam tak kan nei niin a lang. YMA ten kan minister hnenah Drug Licence pek chhuah a nih dawnin a diltute awmna Branch YMA hriatpuina lehkha thil tel ngei tura an ngenna pawh Sawrkar chuan tun aṭanga reiloteah hetiang anga dan an siamṭhat tur thu ka lo hria a. Sawrkar pawhin theihtawp a chhuah a, kan dan neih te pawh siamṭhatna lamah a inhawng hle tih a lang a, a lawmawm khawp mai.

Dan te hi kan siam ṭha dawn a nih rau rau chuan Pharmacy (damdawi dawr) te hi chu Registered Pharmacist te kutah ngei dah thei ila kawng tam takin kan ṭangkai pui zawkin a rinawm.

India ram pum angah pawh hian Pharmacist-te hi health care system-ah hian kan hmang ṭangkai lo khawp mai a. Mizo tam takte pawh hian kawmpawndar-te hnathawh bak kha kan hre kher lo ang. Hei hian India ram hriselna lamah hmasawnna kawng tam takin a tiṭhuanawp a, India ram hmun hrang hrangah pawh an buaipui a ni tawh a ni.

Pharmacist-te hian damdawi hmuh chhuah leh siam aṭanga a ei dan tur leh mihring taksaa a hnathawh thleng hian kan zir nasa a, Health care professionals zingah chuan a zir nasa berte kan ni.

Damdawi dawr hi a dil theitu tur bituk hi Drugs and Cosmetics Acts-ah a awm hran lo a. Damdawi zawrh hi a mawhphurhna a san tehreng nen hian sumdawnna dang nena inang deuh thawin dawr kan hawng a, a hlawk hlawk kan hralh vak vak a; a nghawng tur kan hre der si lo. Damdawi dawr hi Pharmacist-te chauh hian hawng se, dan an bawhchhiat pawhin Pharmacy Registration hlihsak/ suspend thlenga hmalak theih nise dan loa damdawi hralh ngam an awm kher lo ang. Midang licence hawh leh licence hralh mai mai te pawh hi a awm loh phah bawk ang.

US leh developed countries dangah chuan doctor-in damdawi a chawh reng reng hi Pharmacist-in a lo approve veleh thlap loh chuan damdawi an lei thei ngai lo. Doctor-te pawh hian damdawi hi chawh fuh tawk loh an nei ve fo a, sumdawnna atana hmang duh tawk an lo awm veleh bawk a. Heng zawng zawng lo veng tur hian Pharmacist-ten damdawi dawr an nghah ngei hi a pawimawh hle a. Pharmacist ṭhenkhat damdawi dawr neite hian doctor-te damdawi chawh dik tawk lo an hmu fo reng a ni.

OPD-a damlo in entir pakhat pawh doctor-in Deletus BX leh anti-allergy a lo chawh a. Damdawi dawr a zawh khan an lo nei lo si a, anti-allergy leh Deletus D chu a lo pe ngawt a. Deletus BX leh Deletus D chu a hming a inan em avangin damdawi inang tiin an lo pe a. Mahse Deletus D-ah chuan anti-allergy a lo awmsa tawh bakah a damdawi content-te chu inang pakhat mah a awm lo a. Kha damdawi kha ei ta se chu damlo khan anti-allergy kha double dose a ei dawn bakah doctor-in damlo enkawl a tum dan ang kha a ṭhelh duai dawn tihna a ni a, thil pawi tak a ni.

Damdawi tam tak hi a anpui lei a hlauhawm an tih rualin pharmacist-te chuan damdawi vang leh supply awm mai lote leh emergency-a damdawi mamawhte chu a anpui zawnsak kawngah leh a damdawi dang lo kawhhmuh kawngah, damlote nasa takin an pui thei dawn a ni.

Damdawi tam tak hi a hmel en mai pawha damdawi ṭha lo tih hriat tam tak a awm. Pharmacist tan chuan test kher ngai loin damdawi ṭha lo leh dik lo tam tak chu hriat mai theih a, Pharmacist-te hian damdawi ṭha zawk lei leh hralh kawngah nasa takin min pui thei dawn a ni.

Mipui hian damdawi ei leh hman kawngah hian hriat loh tam tak kan nei a. Doctor-ten natna an en bakah damdawi hman dan dik tak councelling hi an pe hman tak tak lo a. Pharmacist-te hi damdawi ei leh hman kawngah chuan patient councelling petu tur berte an ni a. Damdawi dawrah hian damlo tam tak hian damdawi ei dan doctor-te hrilh fiah loh tam tak an zawt ṭhin a, mahni damdawi inchawha damdawi rawn lei tam tak an awm bawk. Mahni damdawi ei lai dam pui hleithei lo a, damdawi dawra zat fiah hi tam tak an awm bawk. Hengte hi pharmacist-te ngeiin lo ṭanpui thei se, hmasawnna nasa tak a thlen ngei ang.

Damdawi zawrh hi hna awlsam tak anga lang, doctor-te chawh ang ang lo pekchhuah mai ni awm taka lang, mah se hman ṭangkai theih chuan hna hautak tak, thil hriat ve ṭeuh ngai a ni. Computer thiam lo sumdawngin computer operator la dawn se, a mamawh chin thawk thiam pawh a lak theih laiin, computer thiam tak tak chuan a mamawh nia a lo in hriat bak service tam tak a pe thei zawk ang deuh hi a ni. Hei hi hmasawnna min thlen tak taktu chu a ni.

Damdawi zuartu zawng zawng thlak nghal chu a har ngei ang. Mahse hmun pawimawh zual Hospital road-ah te ṭan ni ta se, chuta ṭangin hmun dang pawimawh private hospital-a pharamcy-ah te thlak theih a nih ngei a rinawm. YMA hmalakna hi a fakawm a, a ṭhat lehzual beiseiin rawtna tlem ka rawn nei ve a ni.