Private school - Zirna nge mangkhâwng!

Vanglaini, Feb­ruary tira chhuakah khan private school-te a him tawk lohzia tarlan a ni a, kha khan ka rilru a dek khawp a, tuihnih mi tichâk zual tlat.

Kan tu leh fate zirna ṭha an neih theihna tur atana kan dahna hmun hi zirna hmun nge mangkhâwng tia khaikhin theih hial tura hmun him lo a va tam êm!

Hmun zawl nei lo, tlangrama cheng kan ni a, kan mamawhnain private school tam tak a hring chhuak a, chung hmunahte chuan kan fate zirna ṭha an dawn theihna turin kan dah a. Zirna hmun neitute chuan zirna pek ngawr ngawr kha an tih tur niin an ngai a, a bak mawhphurhna an nei a ni tih an ngaihtuah ngai ang em?

Kawt zawl leh infiamna hmun an neih loh chu thuhran ni ta se, eng emaw, leilung chhiatna leh emergency thil thleng ta se, an school kaina hmun hi a va ngaihtuahawm em!

Ram tam takah, lir a nghin avanga school-in naupang a chhilh sawi tur a awm ṭhin a, thil dang zawng aiin hetiang thil hian khawvel a nghawng chhuak nasa duh. Aizawl khawpuia kan fate kan dahna hmun private school te hi hetiang hmun hlauhawm hi a ni.

Phaizawlah in­sawnna tur chu a awm hauh lo mai a, mahse kan fate, an school-a kan dahte tan hian himna tur an ngaihtuahpui em? School fee chauh hi an thlir a nih chuan nu leh pate tan hian a hlauhawm hle a, kan fate tan mangkhawng, engtiklai pawha per mai thei hnuaiah kan fate kan dah tihna a ni. Lirnghing thlen theih rengna hmuna awm kan ni a, hetiang hi lo thleng ta se, eng ang ruahmanna nge zirna in neitute hian an siam le? Kan fate, an zirlaite himna tur hi an ngaihtuah chhuak thiam lo a nih pawhin, mithiam zawkte rawn­in ruahmanna siam se a duhawm hle.

Kangmei chhuah fahranah pawh tlan­chhiatna tur chuang awm lo leh tawmhimna tur nei chuang lo an ni. An zirna hmunah han kal ila, kangmei chhuah thulh pawha a ṭhelhna tur nei lote an ni tlangpui. Hetiang ringawt hi chu a dik lo. Kan fate nilenga kan dahna hmun a ni a, an himna tur tal hi chu min ngaihtuahpui teh se. Sum leh pai zawng ringawt lo deuh hian mihring hi min thlir thei se, a lawmawm ngawt ang.

Sap ṭawng thiam leh lehkhathiam tak fa nei mah ila, kan fa kha hmun hlauhawm leh ralṭia a awm tlat emaw, an dah tlat reng si chuan nu leh pa tan muthilh a har a, lung a muang thei chuang lo.

Private school-te hian kan school building-ah hian rikrum thila naupangte himna tur hi ngai pawimawh teh se.