Engineer khumtu Mizoram doctor

A hmasain Vanglaini chanchin­buah Engineer hming bula 'Er' tih ka la hmuh ve loh avangin lawmthu ka hrilh duh che u a, khawvel hmun dangah mahni hming bula Er tih dah chut chut hi ka la hre ngai lo a ni.

Tun hma chuan Engineer-te hi eiru hausa thur thur turin mipui nawlpui hian kan dah a, tunah chuan doctor an hausa tawh zawk!

1980's leh 1990's chhoa Mizo lehkhathiam ber berte khan doctor leh engineer nih kha an tum deuh vek a, khatihlai khan engi­neer leh doctor hlawh lam hi chhut nachang kan lo hre ve si lova, engineer chu hlawh sang em em emaw kan ti ṭhin. Engineer chu hausa tura kan dah nghal tlat chhan chu in lian pui pui an sa thei a, car nei thei hmasa pawl an ni a, khawpui chhevelah huan zau tak takah thlam an sa thei tlat a ni.

Lehkha kan han zir zel a, engineer hlawh zat kan han hrethiam ve ṭan a, zirtirtute aiin an lo hlawh sang bik miah lo tih hriatte hian nuih a za thar leh hnuhnawh a, thin a rim deuh bawk.

Tichuan, engineer-te chu college-a zirtirtu aia hlawh hniam daihte ni mah se an chenna in a ropui a, an nupuiten pheikhawk an ngah a, perfume man to leh rangkachang ṭhi leh zungbun 'collection' hial an nei thei a, heng zawng zawng an tih theih chhan hi chu an hlawh ni lo sum lakluhna an neih vang a ni. Engineer zawng zawng chu an nih ka ring lova, engineer tam zawk hi chu an hausa mah mah a ni.

Doctor sawi ve leh ang. Tunlai hian Aizawl khawpuia building lian, mawi leh changkang hi doctor in a tam ber ang tih kan ṭhianpa pakhat hian a sawi.

Ka hriat chinah pawh doctor hausa tak tak an tam mai. Heng doctor-te pawh hi sorkar aṭanga an hlawh zat chu a tam em em bik chuang si lova, zirtirtu kan tihte nen a lo intluk reng a, college zirtirtu senior-te phei chu doctor aia hlawh sang an lo ni leh ta zel a, doctor sum lakluh dan pawh hi zir tham a ni ta.

Zing leh tlaiah damlo an en a, zingah Rs 5,000 la ta se, tlaiah Rs 5,000 lalut leh ta se ni khatah Rs 10,000 an lalut tihna a ni.

Thla khatah ni 25 vel private clinic hawng ta se, Rs 2,50,000 vel an hlawh ni lo aṭangin an lalut tihna a ni dawn si a, lo ngaihtuah ve mai mai teh u.