Kan khawsak sâng lutuk hi
Kan ram dinhmun leh kan sum leh pai lakluh dan te thlirin Mizo hi khawsak tisang ber hnam kan ni hial maithei.
Ṭhalai thawh chhuah nei lo tamzia ngaihtuahin kan khawsak a sâng hle. Chhungte thawh chhuah sain bike kan lei a, petrol man kan nei lo a. Zanah mite tana bengchheng nih hlau miah loin ring tak takin kan la tlan vak vak zui leh ta nghal a! Ngaihtuah chian chuan zahthlak tak a ni. Mahse, kan ngaihtuah chian loh miau avangin kan zak lem hlei lo a!
Kan ngaihtuahnain a phak aia sang phone kan hmang a, chumiin a hrin chhuah chu 'sex video' siam te, hur herh hrim hrimna te leh kum phu loa ngaihzawng neih hma te, thu dik lo thehdarh tih vel te a ni.
Hei hi pha mah ila, mobile phone kan rama a rawn luh hnua mualpho pui an tamzia ngaihtuahin thu dik a ni tih a lang. Pindan chhungril bera thuruk kha kan changkan tum luatnain vantlang mithmuhah min phochhuah sak a, a tuartu chu keimahni bawk kan ni.
Chhiat tawk an awmin a hre hmasa nih chaknain kan rilru a luah a, chumi atana kan chelek hmasa ber chu kan phone a ni. Mite rilru natna ka siamsak ang em? tih ngaihtuah miah loin kan hmuh leh kan hriat zawng zawng phone hmangin kan thehdarh ta tak tak mai ṭhin a, nasa lo ṭhin tak kan ni.
Phone neih changkan hrim hrim hi a pawi lo, kan neihin a tlin a, kan ngaihtuahnain a phak chuan a ṭha! Mahse, tunah rih chuan kan ngaihtuahnain a phak aia sang phone hmang kan tam si a ni.
Nu leh pa pawh kan bang chuang lo. Garage pawh nei ṭha hlei lo khan motor changkang kan nei a, vantlang kawngah motor kan dah a, kan changkan tum luatah vantlang tana hnawksak mai kan ni tih kan ngaihtuah thleng si lo. Neih phak bak neih chaknain a hrin chhuah chu 'hlawh kham loh' a ni a, 'hlawh kham loh' in a hrin chu eirukna leh leiba ngah a ni. Mamawh aia tam mamawh nia inhriatna hian mihring hi retheiah min siam ṭhin.
Kan fate rual kan awh pui luatah an phu loh thil tam tak kan hlan a, an rilruin a phak loh technology changkang kan hman tir a, a chhanna chu nu leh pa te thoin kan tuar si.
Saphoin 'simple living, high thinking' an tih laiin keini chuan 'high living, simple thinking' kan nunpui a nih hi maw! Heng hi siam ṭha tur chuan nu leh pa aṭanga bul kan ṭan a ngai.
Kan thawhchhuah phuin inchei ila, kan thawhchhuah phu in lirthei nei ila, kan ngaihtuahnain a phak tawk ṭheuh phone hmang ila, kan fate a ṭha zawngin rual awh pui ila, a chhanna chu tuna chhanna kan kawl mek ai hi chuan a duhawm mahna.