CBI general consent

Tunlai chu CBI hnena general consent pek leh pek lohah political party mite an inhnial nasa hle mai. An awmna party azirin an sawi dan leh ngaihdan pawh a inang lo.

Chief Minister leh ZPM party mite chuan CBI hnenah general consent pek zui zel a nih thu an sawi a, opposition party pahnih Congress leh MNF-te erawh chuan general consent pek a nih tawh loh thu an sawi thung. Congress party phei chuan ZPM hotute chu CBI hnena general consent pek a nih leh nih lohah mipui hmaa inhnial an cho ni awmin an sawi. Han inhnial se a ngaihnawm zek mai thei.

Ka ngaihdanah chuan, Mizoram sawrkar Vigilance Department-in kumin June ni 27 emaw nia CBI hnena consent an pek thar dan kha chu general consent ka lo hriat ve dan leh ngaihdan ang kha chu a ni tawh lo. A chhan chu, Mizoram sawrkar hnuaia thawkte CBI-in a chhui dawn chuan Mizoram sawrkarin chhui phalna a pek zel a ngai tawh tlat. ZPM sawrkarin December ni 28, 2023-a CBI hnena general consent a lo pek tawh nen kha chuan a inang lo.

Opposition party-te'n CBI hnenah general consent pek a ni tawh lo tia an ṭang hi ZPM sawrkar hotute leh an party mi leh sate ṭanna ai chuan a dik zawkin ka hria. Tuna CBI hnena consent pek mei hi chu a hmaa general consent pek dan nen a inang tawh miau lo a, tuna mi hi chu general consent a ni tawh lo, tia sawi theih a ni.

Opposition party-te hi general consent pek loh vanga sawrkar han sawisel viau turah erawh ka ngai lem lo. A chhan chu, kum kha leh chen an sawrkar a, an sawrkar laiin CBI hnenah general consent an pe duh bik tlat lo a ni. An pek duh loh khan chhan ṭha tak a nei pawhin a rinawm.

Chutih rualin, ZPM sawrkara hotute'n CBI hnenah general consent an pek tur thu an lo puang tawh miau mai a, general consent pek chu an tih awm tak a ni ve tho bawk si.

Keima ngaihdan

CBI hnena general consent pek hi ṭha ka ti vak lo. A chhan chu - Pu Modi-a sawrkarin Enforcement Directorate a hman tan kan hria a, politics-a a khingpuite beih nan a hmang nia ngaih theihin thil a awm. ED ang bawkin CBI pawh hi sawrkar laipuia hotu liante'n an thunun theih, an huat zawngte an chhuitir theih a nih ka ring. Chuvang chuan Mizoram sawrkar phalna la lo te, hriatpui lohtea an duh ang anga Mizorama an chet hi ṭha ka ti lo a, a him lo turah ka ngai a ni.

CBI hnena general consent pe si lo hian Mizorama eirukna leh hlemhletna chi hrang hrangte hi chhuitir theih a ni tho an ni tho a. Chuvangin, Mizoram sawrkar hian general consent pe si lovin, corruption nia ngaih thilte hi chu huaisen takin CBI chhui turin pe ṭhin se la a ṭha berin ka ring.

- Zoramchhana