Personal credentials

Personal credentials awmzia chu mimal chhinchiahna leh document pawimawhte hi a ni. Bank account kaihnawih leh mimal information hai lan theihna hrang hrang a huam bawk. Personal credentials langsar zualte chu–Aadhaar card, voter ID, ration card, bank account, credit/debit card, driving license, passport bakah, mobile leh internet kaihhnawiha kan phone number, username leh password, email address leh password-te hi a ni. Heng bakah hian mimal document pawimawh education certificate leh marksheet, work experience, award leh publication, hnathawh phalna license, passport size photo leh address kimchang, signature, etc. te hi a huam bawk.

Thil sual tih nana an hman dan

Email address & password hi kan email chhiar ruk leh kan hminga email thawn nan, password reset link thawn nan leh information pawimawh rûk chhuah nan an hmang ṭhin. Online lanking login information, bank account number, credit/debit card number leh personal identification number (PIN)-te hi a ruka kan account aṭanga pawisa lak chhuah nan leh online shopping nan an hmang thei a, kan hmingin loan an la thei bawk.

Driving license number, passport number, voter ID number bakah internet kaihhnawih social media account, two factor authentication (2FA) code, e-commerce account, office network service login, email/VPN/intranet etc hi kan hminga thil tih ruk nan an hmang nasa ṭhin hle.

Hremna

India sorkar hian personal credential a ngai pawimawh hle a, a kaihhnawiha hremna pawh nêp lo hle. A langsar zualte han tarlang ila.

Information Technology Act, 2000 (Amended in 2008): Section 43(a): A ruka mimal information pawimawh lak chhuah hi cheng vbc. 1 crore thleng chawi theihna. Section 66: Bank account khawih chingpensak (hacking) hi kum 3 thleng jail tan leh Rs 5,00,000 thleng chawi theihna. Section 66C: Personal credentials ruk a, an lema changa pawikhawih (identity theft) hi kum 3 thleng jail tan leh Rs 1,00,000 lakh thleng chawi theihna. Section 43(b) leh Section 66: Account hack leh personal credential ruk (data theft) hi kum 3 thleng jail tan leh cheng vbc. 1 thleng chawi theihna. Credit card hmanga pawikhawih hi Section 66C leh 66D hmanga kum 3 thleng jail tan leh Rs 1,00,000 lakh thleng chawi theihna a ni bawk.

Bharatiya Nyaya Sanhita (BNS): Section 420: Personal credential ruk sak nana inbum (cheating) hi kum 7 thleng jail tan leh pawisa chawi theihna a ni a; Section 465: Document siam danglam (forgery) hi kum 2 thleng jail tan leh pawisa chawi theihna a ni.

Invenna

Cyber criminal-te hian bumna awihawm tak hmangin thiam takin min dil ṭhin. Personal credential-te hi social media (WhatsApp leh Facebook)-ah post suh. Password hi mi dang tana hriat ruk mai theih loh tura uluk taka siam la, a khât tawkin update rawh. Bank account leh KYC hrilh tura phone call/message i dawng a nih chuan inbumna a ni tih hriat rur. Bank hian an customer-te account detail an dil ngai lo. I bank balance, transaction, financial statement check fo rawh. Internet leh social media a rinhlelh kai email, link leh website click lo la, delete nghal rawh.

Ngaihtuah zui atan

Tunlaiah personal credential hi mimal leh chhungkaw thil pawimawhah a ṭul vek tawh a. Zirlai admission, scholarship leh hna dilnaah phei chuan a tel lovin a tih theih loh a ni ber mai. Zirlai pakhat chauh pawhin kum khat chhung ringawt pawha personal credential a xexrox a, a submit hi a tam hle ang. A bik takin hna dilna leh admission atan mi sang telin document an submit a, a tling lote an return ngai si lo va. Engtin nge an hman zui zel ang le?

Hetiang document tam tham tak hralh leh hman khawloh (data breach) hi India ramah a tam hle. SIM card hi credential document dik thlap tel lova a tihnun theih loh lain, bazara ZIM card nung sa zuar leh lei tur awm reng mai hian ngaihtuah a tithui ṭhin hle. Mi ṭhenkhat, an hriat miah loh laia an hminga bank account lo inhawng sawi tur an awm leh zauh ṭhin bawk. Hengte hian Mizoram pawh kan fihlim lohzia a tichiang hle awm e. Fimkhur tlang ila, kan personal credential hi vawng him zel teh ang u.

- Er. Chhungpuia Renthlei,

Senior Technical Officer,

NIELIT Aizawl