A ṭha ber em?
Zonet Fakselna 7.2.2015 zana miah khan Thakthing bazarah tleirawl zu ruiten buaina an siam ṭhin thu leh mi kawngkal lai thlenga harsatna an siam sak ṭhin thu ka lo hmu a. A mak ka tiin a zahthlak hlein ka hria.
Tunlai chhanah arte takngial pawh an insual duh tawh lo a ni a, chutihlai kara veng changkang leh Aizawl model veng tih hiala veng thianghlimah khatiang thil a thleng mai kha a mawi lo em em a ni. Khitiang thil khi thil awm tak tak a nih ngai chuan veng dangah pawh a kangkai zel ang tih a hlauhawm a, a veng neitute tan tihrem vat a ṭha hle mai.
Kum 1975-76 chho vel khan Shillong-ah khuan hetianga mi sual rawn ching leh buaina siam ṭhin hi an lo awm tawh ṭhin a. Zan dar 6 hnu phei chuan a malin khawlai kan leng ngam ngai lo.
Chutihlai vel vek chuan kungfu kha a lar ṭan hle tawh a, a school pawh hawn a niin kan Mizo pui ṭhenkhat pawhin an zir a, 'black belt' te hial an awm ve a nih kha. Chuan, chung kungfu zirhote chu ni maw? zan lamah inthurualin misual awm ṭha duh loho chu an vai (practice nan an hmang) ta ṭhin a. Kum a vei meuh chuan a reh duak mai a ni.
Khitiang khi thil awm dan a ni a, a ṭha ber em tih phei chu ka hre miah lo.
Amaherawhchu, misual an ngampat lohna a nih chuan Shillong-a thil thleng kan sawi ang khi thleng ve ta zeuh zeuh se, engnge pawi? Kan veng, kan khawtlang a lo thianghlim nan leh a lo ralmuan zawk nan ka ti ta hial a ni. Naupanlai thawnthu ni maw, England rama sualna tihreh nan mi pahnih bak khaihlum a ngai lo te pawh an lo tih ṭhin kha mawle!
Kan sawi belh leh hram teh ang. Hman deuha World Bank Road-a mi leng khawthawng leh awm ṭha hle hle lo tibuai chiam ṭhintu pa pawh kha Police Constable a lo ni reng a. Police arsi kai chin, civil dress-a inthuam khan a tukzal ta der a nih kha.
Khatiang kha thil ṭha ang reng tak niin ka hre ve tlat. In ngaihdan han sawi ve teh u, hei pui Zu kan thlah zalen dawn ta lehnghal a nia!