MEDIA THLIRNA - YMA RILRU
Aizawl Civil Hos-pital Blood Bank-a thawktute lam chhin-chhiah dan chuan, June ni 18, Inrinni khan Aizawl Venglai Branch YMA chuan Civil Hospital-ah a mamawh apiang hman atan thisen an pe a, thisen pek tuma kal mi 100 bawr vel aṭangin mi 32-in an pe a, a dangte erawh chu chhan hrang hrang vangin an pe remchang ta lo a ni. Aizawl Venglaia YMA member-te hian kumin YMA Day 81-na hriatrengna atan thisen pek hi an rel a, mahse an veng chhung mi chin hriat lohva bo an awm avangin, mi bo zawngin khawtlang an phek buai ta si a, an pek tum niah an pe thei ta lo a, YMA Day liam hnu June ni 18-ah an pe ta zawk a ni.
Eng vang teh kher emaw ni, Aizawl Venglai Branch YMA-in YMA Day puala thisen an pe chu cable TV leh ni tin chanchinbu hrang hrangah 'Aizawl Venglai KṬP' ti vekin puanzar a ni a, Aizawl Venglai aṭang ngeia chanchinbu chhuak Vanglaini chanchinbu lehzelah pawh chuan 'KṬP' ti thoin chhuah a ni.
Thisen petute pawl hming puanzar sual palh chungchangah hian YMA hruaitute hnenah tihdikna ziah ṭul an ti em tih zawh an ni a, heta YMA hruaitute chhanna hi a mak danglam em mai a, ngawihpui mai atan a uiawm a, YMA rilru pu zawng zawngte tan chhinchhiah tham a awmin ka hria. YMA hruaitute chuan, "Kan theih ang tawk kan pe zo diam tawh a, tu tute emaw chuan an lo hman ṭangkai ngei pawh kan beisei. A petu kan nih puanzar emaw, pawl hming ziah sual palh emaw khan danglamna a nei lo a, Blood Bank-ah khan a dikin min chhinchhiah a, a tawk viau a ni. YMA hming pawh ni se, KṬP hming pawh ni se, a petute kha veng khat ami, mi thuhmun vek kan ni dawn tho leh nghal. Tuten emaw an lo ṭhatpui chuan kan lungawiin hlawhtling kan inti em em a ni," an lo ti then a, chu chu YMA rilru put dan dik tak niin kei chuan ka ngai.
Thil ṭha han tih changa pawl hming uar deuh taka puanzar duh kan awm ṭhin tih chanchinbuah hian a lo lang fo a, ṭhenkhat phei hi chuan an pawl hming tihsualsak palh hlauh chuan awki han san ta viau pawh kan awm fo ṭhin. Kan thil ṭha tih hi miin an hre lo ang tih hi pawl tam tak hi chuan kan hlau viau emaw tih awl a ni. Thil ṭha tih aia a titu lansarh duh riau pawh a awm theih fo mai. Chutih laia Aizawl Venglai Branch YMA hruaitute rilru puthmang hi a lawmawm danglam ve riau a nia.
- Mama