Kan chhe ber lo!
Zofate hmasawnna tura ngaihna hria inngaite leh mi dangte thil tih sel chingte'n kan hnam zia leh kalphungte bakah kan hruaitute an han sel tak tak hi chuan Mizote hnam hian hlutna a nei lo emaw tih a har lo ṭhin lo khawp mai. Mahse mi tam takte inhmuh chhiat an ngawt kan ni lo tihah ka chiang a, India rama inchhuanna tham hi Mizo fate hian kan nei ve chiang em!
Tun hnaia Economic and Statistics Department-in Statistical Handbook 2014 an tihchhuahah Mizoram-a AIDS natna vei zatte leh he natna vanga mitthi zat ka hmuh chuan min barakhaih nasa hle a, kum 2012-13 chhunga AIDS natna vei vanga thi zat chu 168 a nih laiin kum 2013-14-a mitthi zat hi Mipa 299 leh hmeichhia 156 ah a sang chho ta dawrh a, a belhkhawmin 455 a ni. Kum khat chhunga AIDS vanga thi zat punna hi 287 a ni a, mak ka tih em vangin ṭhiante ka sawipui a, chumi hnua an ngaihdan leh tlang thuthang an sawi ka hriat chu HIV+ vei zatte hi sorkar laipui leh funding agency te hnen aṭanga sum hmuh a tam theih nan thuneitute'n a vei zat dik tak aiin an report tam ṭhin tiin an sawi.
A zawng zawngin a dik vek lo thei a, mahse thil dangah pawh hetiang case hi a awm a rin theih a, ngaihdan siam thiam a pawimawh rualin kan landan aiin a chhungrilah kan chhe lo tih hi ka ngaihdan a ni.
Kan vâi mikhual Aizawl tlawhtute'n hahipa an sawi ṭhin pakhat chu Aizawl traffic hi a ni a, hetianga lirthei tamna leh jam nasaah hian lirthei horn ri chuah chuah an hre ngai lo hi mak an tih thu an sawi fo a, India ram state dangte laka inchhuanna tham a ni.
Horn ri bengchheng hriat tur awm lo hi kan hawihhawm vang a ni a, state dangah hetiang khawpui hi a awm a nih pawhin a tam lo ang.
Kan hnam nunphung leh zia te, kan tlawngngai pawlte, kan kalphungte leh kan hruaitute hi kan duhthlan an ni a, a sel chin tawk kan hriat a pawimawh.
Mizo nih a hlu tiin kan sawi ṭhin a, a tihlutute chu keimahni kan ni a, kan tihlu lo thei bawk.
Mizo hnam hi hria nia inngai nazawng siamṭhat theih leh tihchhiat theih a ni lo a, nitina keimahni ṭheuh kan insiamṭhat hi a tawk fu!