Nu pakhat
Nu pakhat hian khawizu a rawn zuar a, a fak thiam em em mai a. Khuai khawia eizawng kan ni a, keimahni khawi ngei ka rawn zuar a. Kan ṭhianpa chuan kan mamawh em a, to deuh mahse tiin a leisak ta a. Kar khat hnuah chuan a saidawium mawng lam chu kurtaiah a lo chang hman nia!
Nu pakhat hian theiden a rawn zuar a, vitamin ṭha chi, taksa chakna, pa upa lam phei chuan ei ngei ngei chi tiin a rawn zuar a. Kan han en chian chuan, bung rah hmin tla, hmarcha hmui leh chi nena den pawlh kha a lo ni a, sumdawn thiam tak a ni a, a hralh theih viau phei chuan a hlawk hle ang.
Nu pakhat hian chhangban a rawn zuar a, buhban hmui chi, thingtlang lama kan chhungte thar a ni a, lei rawh u a ti a, thingpui hmehah fun hnih kan lo lei a, thingpui in hunah chuan fun khat chu kan han phelh ta a, kan phelh kan phelh a, a funna chu chaw ei dawhkan a khat thur tawh mai a, a tawpah chuan tlemte a lo awm ngei mai a, han sawhkhawm chuan sazu tiat lekin ka hmet hlawm ta nget a.
Nu pakhat hian Sairil tui a rawn zuar a, sam tlakawlh tana ṭo thar lehna. Sairiltui hi hman chuan sam kawlh a awm thei lo, a ti thar leh zel a rawn ti a, Sairil chuan tui a pai tlem teh reng vei nen, saidawium khat vel tur pawhin Sairil kung za tel fe a ngai ngei dawn si a, saidawium 5 lai a la ak si a, Sairil a va suat nasa dawn em... tiin ka ngaihtuah zui a.
Nu pakhat chuan anṭam a rawn zuar a, keimahni thlawh-lai anṭam a ni a, a hang teh asin, keima thar a ni bawk a, ka pe tlawm ang che u a ti a. Kan lo lei sak ta a, tlai lamah chuan le thlak turin kan han phelh nak chuan, anṭam kung a bul aṭanga rawt, a bul lam thup bo nan tumtel hnan a lo ni a, anṭam kung khat chauh chu Rs. 30 in kan lo lei a nih chu.
Nu pakhat hian khawchhak meihawl ṭha, Tlangsam
aṭanga thing chang hlang hlak an rawh, kan han lak a nih hi tiin a rawn zuar a. E, khalaiah khan tung mai rawh ka ti a, kan lo leisak ta a. Tlaiah dahsawn tura a ip kan han chawi chuan, a zang teh durh em a, thing chang ṭha a nih chu ka ring lo reng a, kan han chhem chuan a vam hum hum a, a ral duak duak bawk a, kar lovah ip khat chu a zo der, kar khat pawh kan tla mang lo a ni.
Nu pakhat hian limbu tui fir ṭha, tui pawlh loh, hei kan phone number pawh kan tar hi a ti a, a han in sawi rinawm bawk a, um khat kan lei a. A thur dan teh vut kha ka ringhlel deuh a, a chanve pawh kan in hma khan (ni tin tlem tlema damdawi anga inah tia lei ka ni a) ka pumin a hre ta a, nasa taka tui pawlh a, acid a tih thur leh te an ching an ti lehzel a lo ni a.
Nu pakhat hian cancer damdawi ṭha lutuk, a ei tawh chu an dam zel, hei a leitute chu thla 8 hnuah kan kan leh zel a, tuman an sawisel lo, cancer vei lo tan pawh inven nan a ṭha asin a ti a. Chu a damdawi sawi chu Kaihzawl pil, kil li a bun thliah thliah a phoro hi a lo ni a, a leisaktute hming list a sawi pawh a keng zel a ni.
Nu pakhat hian Sakawr ek a rawn ak ṭeuh mai a, ka pu septic tank a thlakah lei ve rawh, septic tank khat tlat tawh pawh kg 1 lek hi han thlak ve la, a kam vek mai ang, min rawn order tute an lo awm loh avangin lei hlauh rawh a rawn ti a. Sakawr ek kg 1 lek thlak avanga septic tank khat tlat han kam duak chu engtinnge maw sakawr ek chuan a zuk tih dawn ni, ngaihtuah a ngai mang e.
Nu pakhat hian Vai hmarcha hmui hi sarangah pack-in a rawn zuar a. Hmartlangdung Senvawn khaw bula awm kan ni a, keimahni loa kan chin a ni a, a thak ṭha teh asin a rawn ti a, kan lo leisak a. Hmarcha hmui leia kan lei kha zuk thak mang hauh lova, engtin nge maw an tih tehreng ni.
Le, sawi tur a pung tuk tuk mai a, rehbun chin kan neih mai loh chuan Aizawl khawpui veng tinah hian in tina lut lawr a, thil zuar an tam si a, buma kan awm loh nan fimkhur taka thil lei a ṭul thu tarlanna remchangah ka han ziak ta duah a ni e.
- K. Hrangluaia,
Mission Vengthlang