EI LEH BAR LAMA HMATHLIR

Kan ram kan into­delhna tur hian kawng tamtakah sawrkarin hma a la a, khawilai laiah emawte chuan pa ṭhenkhat taima leh tumruh deuhte chu hlawhtling sawi tur an awm pawh a ni awm e. 

Oil Palm chingtute leh kuhva, hmun phiah leh thlai dang dangah hian hlawhtling an awm nual niin a hriat a. Kan Chief Minister zahawm takina mau ṭha chi a tih te pawh hi a ṭha viau maithei tho a. Nimahsela, eng thlai pawh hi lo nei ṭeuh mah ila buh ber hi kan neih si loh chuan kan intodelhna pawh chu a khingbai viau dawn lo'm ni? 

Tunah hian vai buh ringin kan awm mek a, kan tangka hi vaibelchhe tel buh lei nan kan hmang reng mai a ni a. Nikhat pawh chaw ngheiin kan awm thei lo a. Kan buh leina te hian engemaw khuarel chhiatna- Tuilian emaw, rial emaw indona te pawh a ni thei a, buh lei tur hi lo lei thei ta lo ila engtin nge kan awm ang? Kan ramin buh kan thar ve chu kan thla thum ei chauh a ni an ti ṭhin a, hei hi thil dik a nih chuan thildang zawng ai hian buh kan neih theihna tur hi kan thupui bera kan neih a ṭul a ni lo'm ni? 

Buh kan neih theih dan tur nia keiin ka chhut chu, kan ramah hian phai leilet nei tam tak an awm a- Champhai te, Hnahlana Lailiphaite, Khawzawl Tuisenphai te, Thenzawlah te, Chemphaiah te, Serchhipah te leh kan hriat sen lohah hian phai nei an tam em em a ni. Heng phai nei zawng zawng hi en kim vek se, report kimchang an hmuh aṭangin an phaiah harsatna an nei em, tui thuah te leh a kawng thuah te tun aia hlawk zawka thar theih dan a awm em? An phai chu han zauh belh dante a awm em tihte ngun takin en sak se. Tin, an ram chhungah kawr kam zawl emaw, zawl dang reng reng mihring thaa siam theih loh, khawl hmanga siam theih tur a awm em? 

Tin, VC tin hnenah an ramah Terrace a laihzawl theih tur mualmu ṭha an nei em tihte ngun takin dap chhuak se. Tarrace-ah hian tui pe lo van ruahtui ring pawh hian buh hi a neih theih a ni. Chutiang chuan buhah hian thapui han thawh ta ila, thil dang tih ṭhulh chuang loin. Ka han sawi ang hi kan sawrkar chak tak hian a duh chuan a ti thei a ni. 

Pu Hawlan nuaih khat a sem a, Pu Zorama ten nuaih thum an sem theih chuan tuna keiin ka han sawi zawng zawng hi chu an ti thei vek ang tih i ring ang u. Chutiang taka an ṭan kan lak chuan kan intodelh em loh pawhin kan sum vairama liam ṭhin tam tak hi kan titlem thei deuh dawn a ni. Inchhawng sang tak te, concrete in ṭha pui pui te, car nalh tak takte neiin thuamhnaw mawi leh nalh eng ang pawh nei ila, ei tur buh ber kan neih loh chuan mi zah kan kai dawn lo reng reng. 

Kan ram intodelhna tur hi ngun taka kan ngaihtuah a ṭul a ni. State kan nih pawh kum 30 aia tam a ni tawh a, kan sawrkarna fawng chelhtu apiangin intodelh a ṭulzia hi an sawi ṭheuh bawk a, mahse heti khawp hian kan la intodelh si lo. 

Ka han sawi tak ang hian buh ber mai hi kan mamawh leh kan intodelh­na awlsam ber tur pakhat a ni mai lo maw, tiin Zoram Hmarchhak kilkhawra miin ka’n sawi a ni.