Aizawl taxi leh sorkar

Hman ni deuha kan ṭhianpa titi ka hre chhuak thut mai a, "Petrol man a to avangin taxi chuan man a sang ve ziah a, petrol man a tlakhniam hian a tlahniam ve mang si lo," a ti a, ngaihtuah a tithui ve zek asin he thil hi.

Kan ramah hian sorkarin an tihduhdah deuh ber chu taxi pute hi an nih ka ring a, sorkar thuawi lo ber pawh anni tho hi an nih duh hmel a sin.

Han ngaihtuah vang vang mah la, hman kumah khan taxi-te kha an han intlanchhawk tir vel a, an hnathawh hun kha sorkarin a tihtawi sak riap mai asin, khatiang khawpa insawpna nasa kha a awm theih pawh ka ring lova, human rights bawhchhiatna pawh a ni mai thei a, keia hriat phak zuk ni suh.

Mahse maw, heng taxi driver te hian sorkar hi engahmah an ngai bik lo.

Sorkarin mi­thiamte rawnin khunkhan takin taxi fare thar a duang a, uluk em em maiin an chhût ve ngei chuan ka ring. Heng hi taxi driver hoin engahmah an ngai lo, anmahni rate angin an kal hmiah hmiah tih hre chiangtu chu taxi hmang ṭhinte hi kan ni.

Taxi driver-te hi an taxi chhungah chuan an han lal em em khawp a, an hmel an en vang vanga a zuamawm deuh chua fare an han phut sang nghal ṭhuai mai a, hengte hi taxi driver-in sorkar rate siam an ngaih pawimawh lohzia tilangtu a ni.

Tichuan, taxi driver zingah hian sorkarin taxi fare tura a bithliah hi a ziaka kawl pawh hi an tlem ka ring ta deuh deuh a, mipui nawlpui hian kan lo hre kilh kelh bawk si lo a, driver hoin taxi fare sorkar bithliah min entir loh phei chuan a chuan man hi kan hre loa, driver thu thu a ni mai, Transport Minister a thu tak tak tawh lo.

Hei mai hi a la ni lo, a hre chiang deuhte sawi dan phei chuan zing kar hma takah hian taxi chuan man hi a to bik a, zan hi a rei poh leh a chuan man hi a to zual bawk a ni awm e, hengte hi mak ve mai mai tak chu a ni.

Taxi fare mumal lohna khawpui Aizawlah hian taxi an tlan loh ni chuan traffic jam hi zuk han ziaawm thut theia mawle, taxi hi engtia tih zel tur chi nge ni ka unau?