Kan ram mamawh

Kan ram mamawh han tih ngawt mai chu, a zau hek hawk hle mai, mamawh kan tih zawng pawh a inang lo hlawm hle mai thei a ni. Mihringte pawh hian mamawh kan nei a, chung zinga a ṭul zual puite chu, chenna tur, eitur, tui-te pawh han ti ila, a dik thei tho ang chu. Chutiang bawk chuan kan ram hian mamawh a nei a ni–ram hruaitu ṭha, ralmuanna, sik leh sa ṭha leh a dangte pawh a tam ang. Kan hriat ṭheuh angin Mizoram chu zim té a ni a, ami chengte pawh kan tlem hle. Kan vannei a, ruahtui kan dawng ṭha a, thlai ilo engkim mai a ṭha duh hle. Kan harsatna tawh ve ṭhin chu, leimin, lei tawlh, kawng chhe ta ṭhin lutukte a ni. Hetih lai hian changkanna avangin ramngawte kan tichereu ve nasa hle tawh a, kan lui neih hote pawh a tlem sawt hle. Aw le, sawrkar thar kan nei a, a kum khatna an hmang ṭan mek a, vawiinah kan ramin a mamawh nia ka hriat ve ang ang te han sawi tum dawn ila. An policy leh manifesto ṭha tak takte zingah tel tho mah se la, han thlur bing deuh te kan han nei dawn a ni.

Ei leh bar:

Hei hi chu kan chiang viauin ka ring, a tlangpui thuin ni tin vawi hnih chaw kan ei a, chhun thingpui, chawhnu, a ṭhenin zan lamah te pawh thingpui kan in bawk. Henga mi zawng zawng deuh thaw hi state dang aṭanga kan lakluh a ni, a leina tur pawisa pawh chu kan thawhchhuah a awm mang lo. Kan pi leh pute hun lai kha chuan kan intodelh ve em em a, mahse, vai len hnu hi chuan ration buhfai tlawm te tea lei tur a tam tak avang hian lo neih chu kan peih ta mang lo, a lo rei hnu phei chuan lo neih chu hna hnuaihnung, hlawk bawk si lo, a lo ni ta a ni. Kan ni tin eitur te chu phai rama mi kan ring ta deuh vek a ni ta mai a, loneitute chu kan ngaisang lo/awt lo khawp mai. Mahse, vawiinah chuan ka buai leh si ta ber a nih hi, kan chawkluhna kawng emaw a buai chuan chuti hlauh chu kan ni ta. Chuvang chuan, kut hnathawktute dinhmun kan chawisan a ngai, lo neih lam kan uar a, intihhmuh theih nan.

Sum leh pai:

Bible-a kan hmuh dan chuan sum ngah hi mihring damchhan a ni lo, a ti. Mahse, ringtu ṭha a nih chuan kawng engkimah a lo hmuingil a, a taimak em avangin a lo neinung viau ṭhin a ni. Hetih lai hian Kristian ni ve lem lote pawh an lo hmuingil a, an neinung em em thei tho a ni. Zoram khawvelah pawh sum leh paia intlansiakna a nasa, a ṭhente phei chuan diklo takin kan ti ta ṭhin a ni. Khawtlang leh kohhranah pawh a neinung deuh leh nei lo deuh chu tlemin kan en hrang, thlir dan deuh kan nei emaw ni chu aw? a tih theih. Khawvel a ni a, a hausa deuh leh rethei deuh te chu awm ve tur ngei chu a ni a, chuvang chuan a tlan pawh kan intlansiak nasa. A theih dan danin pawisa kan puk (Loan) a, in kan sa a, lirthei chi hrang hrang te kan nei bawk a, thawmhnawte pawh a man to to, chhuak thar apiang kan nei, kan lan dan mai aṭang chuan nei awm tak, changkang awm tak kan ni. Chutiang bawkin sawrkar pawh a lan mai dan aṭang chuan a changkan hmel viau mai, mahse, kan sawrkar hian account balance a nei miah lo, nei lo mai pawh a ni lo, cheng tam tak a ba ṭeuh zawk a ni. Ram sum leh pai dinhmun hi mutmawh hnarmawh a kan neih a, kan siam ṭhat thuai a va ṭul em.

Moral reform:

He thu pawh hi kan hre viau hlawm tawhin ka ring, kan sawina a la rei lo na a, tlem tlem chuan kan ngaihven ve deuh ṭan ni chuan a hriat. Zan lamah traffic duty awm tawh loh hnuah chuan kan duh dan danin kan tlan tawh mai ṭhin. No Parking, tih a lo intar kuau a, mahse, mi tu ma'n min hmuh loh chuan kan dah zuai, kan ti mai ṭhin. Kan ngaihsan em em sapho leh khawchhak hote pawh hian hetiang hi chuan an ti ngai miah lo, chuvang chuan alawm heti lai hmarchhak kilkhawr ber thleng pawha kan lo hriat. An changkang em em a, rinawmna, pawisaknate pawh an keng tel zel a ni, keini pawh engtik ni emawah chuan mi hmuh lai chauh ni lo, hmuh loh lai pawhin rinawmna, thuawihna, kan la nei ve mai thei asin. A ṭul huna dik mang loa thil kan han ti mai ṭhin pawh hi ngaihtuah ngun ngai vein ka hria. Sawrkar kan hmuh dan, sawrkar-in min hmuh dan te pawh hi eng ang nge la ni aw? Pawisain a si thlu vek thei alawm kan la tih chuan, thil chiangkuang vak lo a awm ṭhin, tihna a ni ngei ang. Kan rilru sukthlek siamṭhat lam hi chu kohhran lam tih tur âwm zawk tak a ni a, mahse, ram hruaitute hi an pawimawh em em tlat mai, an langsar, hmuh leh hriat tam ber an ni.

A mamawh loh ho chu – eirukna, thamna, induhsak bikna, thiangzau lutukna, tlak hlauhna, hausak loh hlauhna, etc. te han ti ila, a kim viau mai thei. Kan ramah chuan MLA rethei deuh, Minister rethei deuh leh thil dik mang lo chu tu pawh ni se, lo hnar ngam ṭhak ṭhak ang chite hi kan hrethiam mang lo tlat, an lo awm a nih chuan kan phun nuai nuai ang a, inthlan lehah chuan candidate nih pawh an chang lo hial mai thei. Mizote kan tlem a, kan inhre chiang tlang viau hlawm a, chutih laia a theih loh, ka ti thei lo, lo ti tu, hrethiam thei lotu chu kan ngaithiam mang lo tlat ṭhin. Hetih avang te pawh hi a ni ang kan hruaitute, department lam hotute pawh hian an pawmzam leh mai ṭhin, mahse, chu chu kan tlakchhiatna tur, leiba kan ngah zelna tur a lo ni ve reng a ni. A tawp berah chuan kan mamawh kan han sawite leh a dangte nei thei tur chuan ram hruaitute in pawimawh em em, intihdan a nih chuan reiloteah mipuite chuan kan pawm zel mai ang, mipuite chuan thil ṭha neihna tur a nih dawn chuan kan inhuam ve viau tawh a ni.

- Lalchhandama Colney,

Ph - 9862982321