NAUPANG PROJECT

Ram changkang zawkte ruala ke kan pen ve theihna turin sawrkarin zirna kalphung thar a duang a, kan hmang mek a. A hmingah World Class Education tia vuahin kawng hrang hrangah tun hmaa kan lo tih ṭhin tawhte kalsanin, kalphung thar hman mek a ni.

He kan kalphung thar hi ram dangah pawh tunhma aṭanga an kalphung ṭhin, mi thiam leh chhawrtlak tak tak an chherchhuahna ṭhin a nih vangin kalphung ṭha lo leh dik lo chu a ni hauh lo tih a hriat. Kum tam tak kan lo tih ṭhin tawh thlak a, sawiselna hrang hrang kara a khua leh tuite ṭhatna tura hetianga kalphung thar a kaltlangpui ngam hi sawrkar pawh a fakawm hle.

Amaherawhchu, a hmangtute'n a nihna tur lo leh a nihna pel emaw a nihna thleng pha lo emawa an hman chuan kal phung ṭha tak pawh hi kal sualna a ni thei a, phur ritah a chang ṭhin a ni.

Zirna kawnga kan kalphung thar pawh hi nu leh pa tam tak tan chuan phurrit a ni mek a, a kalphung hi a chhiat vang a ni lo a, a hmangtute'n an hman dik loh vang niin a lang.

He zirna kalphung thara nu leh pate tana phur rit pakhat chu project hi a ni a, naupang tan rilru piansualna a neih tir thei bawk. Naupangin project hautak tak tak sikul aṭangin an rawn hawn ṭhin a, an project tam tak chu computer aṭang lo chuan tih ngaihna a awm lo. Middle School leh Primary School naupang tan chuan anmahnia tihngaihna awm lo te an ni hlawm a, computer nei lo tan dawr a kal a ngai a, a hautak a, naupang project pakhat hian chhungkaw budget a khawihbuai pha a ni. Thil ṭul hauh loa naupang project tihna atana stationary thil lei tur tam lutuk avang hian chhungkaw ṭhenkhat chu an buai hle a ni.

Eng project pawh ni se naupangin an tih theih a, anmahni inhaikuakna kawnga puitu a nih chuan a pawi lo a, mah se naupang project tam zawk hi chu naupangin anmahnia an tih theih loh a ni a, an chhungte'n an tihsak fo ṭhin a, chu chuan naupangah inrintawklohna a siam bakah mahni nihna zahpui leh mahni nihlohna anga lan hreh lohna, thiam hauh loh pawh thiam anga lan hreh lohna naupang rilruah a siam thei a, nakin lawka kan ram hruaitu la ni mai turte rilru hi kan tihkhawloh vaih chuan kan ram hmabak chu boral a ni mai dawn a ni.

Naupang chuan ṭhiante aia ṭha lo bika tih an hlauh avang leh an zirtirtute an hmaizah avangin a ṭha bera tih ṭheuh an duh a, zirtirtute lahin naupangte tih a nih tak tak leh a nih loh lam hawia mark pe loin a nalh apianga mark an lo pek ṭhat ṭhin tlangpui avangin nu leh pate paw'n an fate an pui lo thei lo a ni. Hetiang hian zirtirtu tam tak chuan an ti tlat a ni. Nu leh pa-te'n sum leh tha an sen hi chu thuhran ni se, a pawiber chu naupang rilru kan tipiangsual mek hi a ni.

Chuvangin zirtirtute'n naupang hnena project pek leh project endik kawngah an rilru an siam a ngai a, naupangin an tih theih loh chi chu pe lo se an naupangte pawh hi tun ai chuan changkanna dikah an rilru a changkang ngei ang. Tin, naupang project tihnaa nu leh pate'n tha an lo thawh ve vak te, sum an sen chiam ṭhinte hi chu he kan zirna kalphung hian a tum niin a lang lo a, a do hial zawk mai thei.

Kan zirtirtute hian naupangte rilru leh taksa lama an ṭhanlenna tur ngaihtuah rana an project tur pawh BPL tamna ramah hian a hautak lo thei ang berin pe se. Mark pek kawngah pawh chhungte tihsak chu ṭha tak pawh ni se mark tlem zawk pe ngam se. Naupangte hnenah mahni kutkawih ngeia tih chu midang tih nalh tak ai chuan a hlut zawk thu zirtir se, tichuan kan zirna kalphung hi a ṭhatna tur ang takin kan hmang tawh ang. Kan fate-ah rawn par chhuakin a rah chu ram leh hnamin kan la tlan dawn a ni.

Naupang project hi ho tak anga lang ni mah se naupang rilru a kawi leh ngil zawnga hruai theitu a ni a, naupang hmakhaw hun bakah kan ram leh hnam hmakhaw hun thui takin a hril thei a ni. Kan kalphung ṭha tak hi kalsualna atana hmang loin, kan hriat loh laiin kawng dik loah naupang kan hruai thei a ni tih hre rengin naupang project-ah hian i fimkhur tlang ang u.