Mizote hi zaa za Kristian kan ni em?
Kan Chief Minister Pu Lal Thanhawla hian Mizote, zaa za Kristian intite tih ṭawngkam hi a hmang fo a, a dik tawk lo deuh. Mizoram hi engtiklai mahin zaa za Kristian kan ni ngai lo.
Mizoramah hian sakhaw hrang hrang zawmtu, Kristian, Hindu, Mosolman leh Buddhist-te hi a langsar an ni. Statistics aṭanga thlir chuan Kristian hi zaa 86.97 a ni a, sakhaw dang zuitute belhkhawm chu zaa 13.03 a ni.
Kum 2011 chhiarpuia Mizorama mihring awm zat chu 1,097,206 a ni a, amaherawhchu, sakhaw hrang hrang dinhmun hi February 2015 thleng hian Census lamin an la tichhuak thei lo. Chuvangin, sakhaw hrang hrang dinhmun chu kum 2001-a India ram chhiarpui aṭangin kan en lo thei lo. Chutah kan hmuh theih chu: Mizorama mihring awm zat 888,573 aṭangin Kristian chu 772,809 a ni a, chu chu 86.97%% a ni.
Buddhist 70,494 an awm a, chu chu 7.93% a ni a, Chakma-ho hlawmpui hi an ni ber. Hindu hi 31,562 an awm a, chu chu 3.55% a ni a, sipai lam chi hrang hrang te, sawrkhar hnathawkte zingah an tam ber.
Islam sakhaw zuitu 10,099 an awm a, chu chu 1.13% a ni a, a tam ber chu Karimganj leh Cachar lam aṭanga mistiri leh hlawhfaho hi an ni. Heng bakah hian Mizo kohhran 0.15% te, Juda sakhaw zuitute hi 0.10% a ni a, chu bak 0.17% chu sawi chiah theih loh, Pathian ring lo te, sakhaw nei lote an ni. (http://censusindia.gov.in/Cens... Population_by_religious_communities.htm).
Statistical Abstract of Mizoram 2013, phek 234 aṭangin Mizorama kohhran hrang hrangte dinhmun, member an neih zat lo thlir ila (kum 2014-ah statistics thar a chhuak a, kohhran hrang hrangte membar neih zat hi dik tawk lo a awm tih Statistics dept. pawhin min hrilh avangin a hma kuma mi tarlan zawk a ni.
Kum 2013 statistics pawh hi 2013 March thlaa lakkhawm a nih avangin kohhran tam tak chu 2012 kum inchhiarna a ni.)
Heng bakah hian Kristian pawl dang tenau deuh zawkte tarlan an nih loh avangin mi 20,000 emaw chu an la awm ngeiin a rinawm.
Tichuan, Mizoramah hian Kristian awm zawng zawng chu 955,313 vel a ni. Presbyterian kohhran hi a lian hle a, Kristian zinga 51.66% lai a ni a, kohhran pawl dang zawng zawng belhkhawm chu 48.34% a nih chu.
Baptist Church of Mizoram - 135,291
Evangelical Church of Maraland - 40,145
Lairam Isua Krista Baptist Kohhran - 26,040
Mizoram Presbyterian Kohhran - 493,526
Roman Catholic - 20,347
Salvation Army - 51,728
Seventh Day - 22,132
United Pentecostal Church
(NE + Mizoram) - 146,104
Total - 935,313