Lengpui Airport leh politics
June ni 26, 2024 khan Congress Bhavan-a an inkhawma thusawitu Pu John Siamkunga, Congress party-a hruaitu leh MLA hlui chuan Lengpui Airport chungchang a sawi dan an party press release-ah an tarlang a. Pu John Siamkunga hian, "Airport hralh an tum pawh hi eng nge a chhan kan hrethiam phak lo. RTI aṭanga a lan danin Airport aṭang hian kum khatah Rs. 19,66,44,228 kan hlep a, sumdawnna ropui tak a nih laiin engvanga hralh tum nge an nih?" a ti niin a lang.
Pu John Siamkunga'n RTI Act aṭanga a lan dan a tih hi ka hmu ve lo a, ka hre ve lo. Zawhna zawttu leh chhangtu ka hre lo bawk. Ka hriat ve chinah Lengpui Airport hi sum hlep zawnga a kal ka la hre lo a, sum hloh hlirin a la kal. kan Airport avang hian Mizoram sawrkarin kum 6 kal ta chhung khan cheng vaibelchhe 140 vel a hloh a, kum 2022-23 chhung pawh khan cheng nuai 280 chuang a hloh nia sawi a ni.
Lengpui Airport hi state sawrkar sum tam tak kal ralna, enkawl hautak tak mai a nih avangin Congress an sawrkar laia Chief Minister Pu Hawla pawh khan Airport Authority of India emaw hnena hlana enkawltir a lo duh tawh ṭhin a, hmalakna pawh a awm tawh ṭhin. Mahse, opposition party aṭangin sawiselna a awm a, an duh leh ṭha an tih ang chu an kal tlangpui ngam lo zel.
Tunah ZPM party an sawrkar a, Lengpui Airport chu AAI emaw, private company emaw hnena hlana enkawltir tumin hma an la a, a hlawhtling dawn em hriat a ni lo. Rin lawk ang ngeiin opposition party lamin sawrkar sawiselna remchangah an lo hmang leh nghal chat mai. An sawrkar laia AAI emaw hnena Lengpui Airport hlan duh ve tho party pawh khan an sawrkar loh chuan hmâna an duh ang thoa tih tumtu sawrkar chu an sawisel ve leh mai chu a ni hi!
Party hrang hrang hian Airport enkawl hautakzia te, Mizoram sawrkar sum tak tak kal ralna a nihzia te, state sawrkar sum hmang ringawt chuan airport changkang taka siam a harsatziate an hre chiang viau a; an sawrkar lai pawhin mi dang kuta hlan an duh deuh zel. Mahse, opposition hovin sawrkar beihna remchangah an hman zel si avangin, mipui dem leh sawisel an hlauh si a, an duh ang chu an kaltlangpui ngam lo ṭhin a ni ber. Mi dang hnenah kan airport neih chhun hralh tum ang zawnga an sawi ṭhin phei hi chu an uchuak hle a ni.
Lengpui Aiport hi Mizoram sawrkar ta a nih avanga Mizoram leh Mizo mipuiin AAI emaw enkawl aia kan hlawkpuina leh ṭhatpuina lian tham ka hre lo. India rama airport dangte hi an awmna state sawrkar ta leh enkawl a nih loh avangin an awmna state sawrkar leh mipuiin eng nge chân phah an neih? Kei chu ka hre lo. Lengpui Airport hi AAI-in emaw enkawl se, tun ai hian a changkangin a changtlung zawkin ka ring, Mizoram mipuiin kan chhuang zawkin ka ring bawk.
- Vanlalhlanpuia