CHIEF MINISTER NI VE TA ILA CHUAN

Tun hma lam aṭang tawhin ram hruaitute kan sitna leh duhthawhna lamah, "Kei chu ni ve ila..." kan ti fo a! Thil ṭha tam tak tih tur kan sawi a, a tih dan pawh hriain kan inngai a. Zei dawn hle nite'n kan insawi a, kan inzuar bawk a; tihhlawhtlin duak duak theih kan inbeisei ṭhin.

Tuna Mizoram sorkar dinhmun hi en ila, a chîk peih deuh tan chuan nuih tet tetna tur a awm a awm nual tawh! An minister pakhat phei chuan pawn lama an lo sawi ṭhin dan leh a chhûngah chuan a lo inang lo hle tih a sawi!

Pa pakhat indang thar, hawihai zette pawh kan ang thei rum rum a. Chi bûr dahna thlengin ngaihtuah a lo ngai tawh a! Têl, chini, aieng, ajinomoto ilo fahran, ration buhfai khulhna, electric bill pêk ngai, ram chhiah, fate sikul fee nen; chûng zawng zawng dap kim vek ngai nih inhriat hi hunin a hrilhfiah chawp kher kan nih chuan hma a sâwn theih ngai loh vang.

Ni e, ram hruaitute'n an insawi anga thil an ti leh si lo nia kan hriat hian kan sit a, ṭawngkam hriam tak tak hmangin kan sêl a, ṭhahnemngaihna phei chu a ni vek mai thei e.

Chutih rual chuan, khawtlang leh kohhrana kan hruaitute pawh hetiang tho hian kan ti a, kan duh tâwk lohnate kan sawi nasa thei hle. Pastor ṭhenkhat ram hruaitute tlawn chîng, an in leh a vela hmuh tur awm fo nihte hi a him lo thei hle ang em le?

Sorkar kal tawh, a chhe thei ang bera kan han chhuah mai ṭhinte hi ka ngaihtuah let ve ta fo va. Thil hi kan chîk lem lo tih hi a Mizo mipui nâwlpui ang hian a chiang khat hlein ka hria. Sorkar kal tawhte thil ṭha tih sawi duh miah lo, eng emaw kan han ti ṭan ve dawn a, hahîpa infak nghal mai hi chu a zialo lam deuh. Mite'n min fak hun leh kan thil tih chu ṭha an tih thu hi sawi zawk se la, a mawi ang a, a tlo zawk bawk ang.

Chief minister hi kan ni luai luai dawn hauh lo. A ni teuh thei deuh MLA leh minister zingah pawh hian ni lo tur an tam zawk daih. Chuvangin, lal ber kan nih ve theihna hmun kan chhungkuaah chuan chief minister chu ka ni ve tihna a ni mai a. Chhungkua ka enkawl dan leh kaihhruai dan hi a ṭha tâwk em le, tih hi inen let nan hmang ṭheuh thei ila.

Mi fate kut vûng bêr bûr, ke vûng ber bûr... kan ti chiam dawn a nih pawhin, chutiang sawi thei dinhmunah chuan ka ding em? Eng nge ka fate an an, tih hi chhût ngam hmasak a ngai khawp mai!

Nia, ka hnathawhna hmunah hian hotu chan ka chang ve a, ka nau te, ka thawhpuite ka enkawl dan hi a lungawithlâk em? Thawktu ṭha lo chu hrem thei, chawpchilha bân hial thei, a tûk aṭanga mi thar la nghal thei ka ni mai thei. Mahse, ka ti ṭha tâwk em? Ka naute chu ka chungah an lungawi em? An thla a muang em? Principal/ headmaster-te hi kan thawhna hmunah hian chief minister chu kan ni mai a, kan thawk ṭha tawk em le?

Aw le, chief minister nih hautak turzia hi ka ngaihtuah thiam chiah lo zâwk a. Mipuiin kan beisei dan, sorkar laipui dawr dan, sorkar hnathawk, (an huat thu suhah) mahni hmasial tak tak, fing thiam tak tak, lehlamah Tuikuk leh Chakma chungchang, ramri buai, thil man sâng, chhiah, dan thar siam zawng zawng, politics lama an mite pangchanna leh eptute'n thu dik lo hmanga vau titiha an nawr vel ṭhin dan te, tlawmngai pawl leh pawl dangte duh dante nen; taksa leh rilru hrisel neih, taimak a ngai dawn mang e aw, ka ti ṭhin.

Chung thil chu Pu Ch. Chhunga, Brig. T. Sailo, Pu Laldenga, Pu Lal Thanhawla leh Pu Zoramthanga te chuan an lo paltlang vek tawh a; an ngaihsanawm asin. An hun lai khan tute emaw mawhchhiat reng rengin lal ṭhutthleng kha an ṭhut lo va, chutiang atan chuan hun an hmang lem lo!

Mihring ve ta chu nawmsam loh deuh te, chaw ei tui loh, mut tui loh, rilru hah leh thinrim lai, an chenpuite leh laina dangte avanga mangan ve viau laite pawh an nei ve ngei ang a, damloh leh lusûn thlengin. Kan bâwr buai dan leh kan duh dan thlen zozaite ringawt pawh hi chauhpui tham ni hialin ka hre ṭhin a, a lâk zângkhai dan riau, shortcut mak deuh an hria a nih loh chuan thaupui chi, mûm tul tulna tur ni loin ka hria!

Chief minister chu lo ni ve ta tehreng ila, 'populist step' an tih ang chi, mipui hmuia chithlum tah, a tawpna ṭha si lo, chawpchilha intihlawm tumna hi ka kal dan tur a nih ka ring lo a. Ka thil tih chu a rah hmuh hman a nih a, min duh zui ta phian a nih leh thu dang ni se, rah chhuah hman ting si lo, mipui tithinrim tâwk vel lek, harsatna a lo thlena mawh la ngam lo, hma tâwng ngam chuang si lo, puh tur dap mi, zûzî taka ram hruai chu ka tum hauh lo thung ang.

- Zobiakvela (Masena)