Pathian hnaihtu ṭhalai

Mi tam berin kan sawi ṭhin leh titinaah te, thuhriltute pawhin an sawi tam tak chu kan rama sualna tamzia leh ṭhalaite zinga sualna pun nasatzia a ni. A dikna chin pawh a awm ang. Ni tin social media leh chanchin thar lamahte ruihhlo man te, sualna chi hrang hrang puan chhuah a tam hle ṭhin. Intizawlnei deuhte phei chuan kan ram sualna sim tur tamzia leh Pathianin Zoram sualna avanga a hrem tur lo tlangaupui tawk lah an awm reng ṭhin bawk. Thil ṭha lam ai hian thil sual lam hi a thang chak zawk emaw tih tur a ni. Mite thil tih pawh hi a ṭha lam ai chuan a chhe lam sawi nuam kan ti a, a thang chak zawk a, kan chhinchhiah duh hle bawk. Mi ṭhenkhat phei chuan mi chanchin ṭha lam sawi ṭha duh si lo hian a chhe lam ngawt hi sawi nuam an ti a; mi chanchin chhe lam sawi tur hian kan che rang thei hlawm hle zawng a nih hi. Kan ram politics pawh hi chutiang deuh chu a ni zo tawh a, a bilhah tho tawh hek lo le; politics hi insawiselna hmunpuiah kan chantir a ni deuh ber tawh a nih hi maw. Mahni kan ingaihdanah hi chuan kan dik vek bawk ṭhin si a, a buaithlak teh zawng a nih hi.

Zorama sualna pun nasatzia chu kan hre ṭheuh a, nimahsela, mi zawng zawng hi an sual lo tih hriat erawh a pawimawh. Ṭhalai ruihlo ti leh hmeichhiat mipat lama kal nasa an tam laiin, ṭhalai invawng thianghlim fel tak tak hi kan ram hian kan nei ṭeuh mai. Nikum 2023 March thla aṭangin Prayer Mountainah Director-in ka awm a, a tak ngeiin ka hmu a ni. Prayer Mountain rawn hmnagtu tam ber hi ṭhalai an ni tlat mai. KṬP, ṬKP, SAY, PYD-ten an rawn hmang reng a, a chang chuan ṭawngṭaina in 72 lai awmte hi ṭawngṭai inchan lovin an innghak ṭhup ṭhin. Kohhrana nuho pawl te, mipa pawl lamte an rawn kal châmchi bawk. Chu mai a ni lo, ṭawngṭai chaw ngheia riak hi ṭhalai an awm reng a, a ṭhen chuan ni thum leh zan thum te, a ṭhen kar khat te, a ṭhen thla khatte chaw ngheiin an riak ṭhin a ni. Ṭawngṭaia chaw ngheia riak hi engtik lai pawhin mi 10 aṭanga 20 hi chu an awm reng ang a ni. Ni tin mi 10 aṭanga 30 inkar hi ṭawngṭai bethel neiin an lo kal reng bawk. “Pathian hnathawh ropui tak lo thleng ṭhin hi ṭawngṭai reng ṭhin tu emaw lo awm nen chhui zawn theih a ni thin,” tia DL Moody-a lo sawi hi a dik hle a ni. Chutiang chuan kan ram hi sualna a pung a, a chhia kan tih rual hian mi ṭha leh Pathian duhtu ṭhalai rual hi an va tam si em!

Mak deuh mai chu Prayer Mountain hi Pathian Thlarau hian a luah tlat tih tur a ni. Nupa lama harsatna nei te, ngaihzawng lama harsatna nei te, mimala harsatna nei tam tak rawn bethelin an rawn riak ṭhin a, malsawmna tam tak dawngin an haw ṭhin. Ramhuai mante thlengin he hmunah hian an lo kal a, ramhuaite pawhin he hmun hi an hlau a ni. Damna leh thlarau pâwlna nasa tak changin an haw leh ṭhin. Kohhran bik awm lo, mi tin tana ṭawngṭaina tura hawn a nih angin kohhran hrang hrang hi he hmunah hian retreat te, bethel-te neiin an lo kal reng a ni. Ministry hrang hrang leh evangelist team hrang hrangte’n an rawn hmang ṭangkai em em bawk. Ṭawngṭai mi tam takte avang hian Lalpa’n kan ram hi min chên chilh reng a ni. Kan ram, Kristian tamna ram siah hian nupa inrem lo te, sex hman sualna te, ruihhlo hman sualna leh a dangte tam hle mah se la, Lalpa tana ṭawngṭaia he hmun sang leh hla taka lo kal ṭhinte avang hian kan ram chu chhanchhuahin a awm zel ang.

Corruption hian kan ram min tibuai hle mai. Corruption hi pawisa lak luh dik lohna mai a ni lo; mahni hnaa dâwngdah tak te, hun vawn dik loh te, aikal la te, dik lo taka document lem hmanga hna thawkte leh a dang tam tak a awm. Chutih lai karah chuan mi ṭha tak tak leh rinawm tlat an awm bawk. Kristian ram siah hian mi dik takte chu sirah hnawlin hnawk kan ti em em mai a, mi mâwl leh nachang hre lovah kan puh lek lek mai zawng a nih hi. Abraham Lincoln-a’n, “A ṭha ber beisei la, a chhe ber hmachhawn rawh,” a lo tih ṭhin hi kan rama mi dikte hian an tawh mek chu a ni. Kristianna te, kohhrante kâwrah hmanga lemchang ṭhin mi eng emaw zat an awm lai hian, mi dik leh ṭawngṭai mite avang hian kan ram chu Pathianin a la hum reng a ni. Ṭhalai rual za tam tak tih tak zeta ṭawngṭaia Lalpa au ṭhintute hi an va hluin an va hmuhnawm ṭhin em! He hmun aṭang hian ram hruaitute tan te, kohhran tan te, mipuite tana ṭawngṭai ṭhinna hian kan ramah harhna dik chu a thlen zel ngei ang.

Zo fate inzawm khawma chenna tura a lo buatsaih, Zo fate tana Jerusalem–Mizoram hi Lalpa Thlarau nen a inzawm tlat a. Chutianga kal lo va, thil dik lo titu, sualna pawmzam a, hlemhletna pawisalotute hi chu Lalpa’n a timualpho zel dawn. Thihna kan tawk tam em em te, natna kan tuar te, ruihhlovin heti ema kan ram min tibuaite hi Lalpa tana kan rinawm tawk loh vangte pawh a ni thei a ni.

Ram hruaitute hi mipuite’n kan thlâwp tlat a ngai a, mipuite kan dik loh chuan an tum angin kan ram hi siamṭhat a har dawn a ni. Ram hruaitute hian an theihtawpin ram ṭhatna tur chuan hna an thawk ṭheuh mai, mipui hian kan duhâm leh mahni hma kan sial lutuk avang hian kan tihsualtir ṭhin tam tak a awm.

Kan ram hi rorelna dik a awm a, khawvel hmun dang leh state dang aṭangte pawha entawn tlak kan nih theihna turin simna dik leh Thlarau Thianghlima thuam ni turin tih tak zeta simna duha ṭawngṭaina nen Lalpa i au teh ang u. Chutih lai karah chuan ṭhalai invawng thianghlim leh fel, ṭawngṭaimi, Pathian duhtu tak tak kan nei hi a van lawmawmin a va ropui em! Mi zawng zawng hi kan sual vek lo ve, kan ram lah a chhe vek hek lo; mi ṭha leh dik eng emaw zat leh ṭawngṭai mite kan neih avang hian kan ram chu chhanchhuahin a awm zel ang.

- Reuben Lalnunthara Hnamte