BJP LAW LAW MAI ILA

Assam state-a kan awm laia Zoramin MLA pathum chauh kan neih ṭhin lai khan Mizo Union khan ruling party Congress kha zawmin an ṭhutna lamah an zuk ṭhu ve ṭhin a. Hun eng emaw ti hnuah Assam tlang mite politics avangin an ṭhutna chu chhuahsanin, lehlamah an han ṭhu leh hlek a. Chutih lai chuan Pu A.Thanglura khan a party, Mizo Union bansanin Mizoram Congress a rawn din ta a ni.

Mizo Union a nih laia suihkaih hliha an zuk zawm der der ṭhin lai ai khan a neitu ta vang mai a. Mizo Union a nih laia a thlen san ber Chief Parliament Secretary aia sang zawk, Cabinet Minister hial a han ni ta a. Mizo history-a chuang kum khua tawh tur Mizo zinga Cabinet Minister hmasa ber a ni ta a ni.

Hetihlai hian Pu Laldenga-ten MNF rawn dinin rambuai rapthlak tak kan lo tuar ta a. District Council-a sawrkarna changtu Mizo Union sawrkar chuan central sawrkar zuk dawr fo a lo ṭul ta a. Chutia an zuk biak ṭhin chuan central Congress sawrkara Prime Minister Indira Gandhi chuan, “Engpawh nise thu a tam a, kan party Congress thu a awm a, MNF thu a awm bawk a, nangni Mizo Union-in thu hran in rawn nei bawk a, keini tan pawh thiam a harsa a. Nangni Mizo Union khi kan hria che u a, in ramah khian party hlun leh rintlak ber sawrkarna pawh chang ṭhin in ni a, thawhpuiah pawh kan duh che u, mah se kan party in ni si lo a. Tunah party te tak te la ni mah se a hmingin kan party Congress an awm ve si a, chuvangin nangni tenen rilru in hmu tlang zawka in ram dinhmun kan ngaihtuah theih nan, han hawng ula kan party Congress nen lo han infin rawh u,” a lo ti a.

A vawikhat sawinaah chuan Mizo Union chuan ngaihtuah zui pawh a tum chuang lo a. Mahse kan ram buai harsat thu an zuk thlen apianga Congress nen infin tura an lo tih ṭhin avang leh MNF lah chuan Mizo Union chu an tai tlat reng bawk si avanga thu ṭha sawi a harsat bawk si avangin loh theihlohnain a nawr a ni tih hriain Mizoram Congress party ding mekte nen chuan inremna siamin Congress party-ah chuan an in chhunglut ta a. Chuta ṭang chuan Mizoram Congress chu Mizorama political party lian ber sawrkarna pawh la fotu a lo ni chho ta zel a ni.

Mizo Union kha Congress-ah inlet duh loin ding lui ta zel sela, central Congress khan an party vulh len tumin a rawn nek chep zel ang a. Chutih laiin MNF lahin an huat ber a lo ni bawk si nen, tuna Congress party an nih hnua sawrkarna an lak fo ang hian an la fo ṭhin tawh hauh lo ang.

Hmanni lawkah MP kan inthlang a, Congress party chu nasa taka tlachhiain tunah chuan BJP chu India rama political party lian ber a lo ni ta a. Sawrkarna a lak hma khan mi bengvarten Mizoram BJP Unit fel takin an lo din tawh a. Hei hi central BJP khuan Zoram politics chungchangah a thu lakna ber tur a ni lo thei dawn lo.

Tunah hian Mizoram Party lian pakhat MNF hian hmanlaia Mizo Union-in Assam Congress ruling party a zuk zawm ṭhin dan ang deuh khan suihkaih hlihin BJP hi a zuk zawm mek a. Hei hi Mizoram BJP Unit tan hian thil lawmawm a nihna a awm miah lo. Anni aia an zuk tlaktlum zawk phei chuan hnawksak an ni zawk ang a, inhek tawna, buaina siam tamtu mai a ni thei.

Mizoram hi hmun kil­khawr leh mihring pawh tlemte kan ni. Hmun khawk­rawka cheng kan nih bawk si avangin development lamah kan hautak em em lawi si a. Intodelh turin thawh chhuah kan la nei thei si lo. Chuvangin, central-ah khuan min hre chiang leh min hmangaihtu bulṭhut nghet kan neih a ṭul a, party lian eng emaw tal khu kan zuk zawm a ṭul ṭhin a ni. Chumi atan chuan Congress khu han ti dawn ila, Mizo Union-in a lo zawm daih tawh si a. Tunah tak phei khu chuan an dinchhuah leh hun tur hriat phak a ni tawh lo.

Tun sawrkar khuan tluang taka a term a hman zawh ngat chuan term khat dang a la chelh leh zel pawh a beiseiawm a, thuneitu leh sumbawm taivawntu zuk zawn thiam hi a ṭul asin. Chuvangin, MNF hian tuna an zuk zawm dan ang mai ni lo hian, “Ka pumin ka inpe ang e, chu chauh chu ka theih tawk,” tiin BJP-ah hian in chhunglut law law se a ṭha khawp ang.

National party kan zuk zawm avang hian Lala te, Liana te kan nihna engmah a danglam chuang lo a, Zorami kha Vairami a nih phah chuang bawk hek lo. Kan chenna ram (India) mipuite nen innel tawnna ṭha zawk min siamsaktu a ni zawk a ni.

Tunah hian MNF hian an party symbol-ah Sakei an hmang a. Mizote chuan Sakei hi sahrang leh ṭihbawiawm bera kan neih a ni. Hei hi MNF hian symbol-ah an hmang rei tawh bawk a dah ṭha tawh se la. BJP-a an inpek luh chuan pangpar (lotus) par chu an party symbol a lo ni tawh ang a, midangte tan pawh a nelawm tawh zawk ang.

MNF-ten Independent an han sawi vel ṭhin laia Pu A.Thanglura'n, “Independent sual chu keini tan chuan pialtlepa liluh tum ang a ni,” a han ti khawl mai te leh, Pu Ch.Chhunga'n, “Hetia India Union tluang taka a kal chhung hi chuan Laldenga hian a sawi ang hian Independent hi a hmu lo ang tih chu, ka kutzungchal hi ka kutzungchal a ni tih ka hriat chian tluk hian ka hre chiang a ni…” a han tihte kha a chian tawk fek fawk tehluh nen; mah se chung ai chuan Pu Laldenga'n, “Vaia te u, in ramah hawng tawh ula, kei ni a ram neituten ro kan rel ve tawh ang e, kan ti mai dawn a ni,” ṭawngkam thiam tak maia a han tih hlap hlap kha chuan mipui lam chuan amen tiin Independent huna talh tur vawk kan vulh nghal nawk mai a nih kha.

Pu Zorama hian Zoram tan BJP belh fakawmzia ṭawngkam thiam takin han sawi se amen tiin kan bawh hum hum lo ang tih sawi theih a ni hauh lo a nia.