School versus Sumdawnna

Tun hnaiah school nei lo, school-a lut tur fa nei site phunna ṭawngkam ang tak tak ka lo chhiar ṭhin a, heng mite group-a tel ve ka nih tlat avangin kei pawh mahni inthup deuh chungin ka rawn zuang lut ve dawn a, ka fate school luhna pawh sawi ri ngai si lovin an thil kalpui dan ka hriat ang angte Mizoram zirnain hma a sawn theih beiseina nen ka rawn thai lang ve dawn a ni.

Ka fate pathum hi school inangah an zavaiin an kal a, tunah chuan a upa ber chuan matric a zo ve tawha school dangah a kal ta a, a school hi chu kan duha kan thlan a ni a, a hming lang lova ka sawiselna hi chu ṭha duhna vang a ni tih chhiartu zahawm tak takten min lo hriatpui ka duh a ni.

Ka fate school chu hmun chep taka awm a ni a, a neitute hian mi in an luah hawh a ni.

A neitute hi chu an hausa tawh tih chu zirlai naupang an tam dan leh kan chhungkua ringawt pawhin thla tin kan chhun luh aṭang hian ka hre thiam maia kei hi chuan, tichuan an school building luah man hi a to vak ka ring lo. School bang ṭhenkhat chu a pawp a, tukverh darthlalang tla balte pawh a awm a, he school hian infiamna tur tualzawl sawi tham a nei lo.

School audi­torium leh play­ground chu sawi ngam a ni lova, chhun chawlhlawklaia naupang infiamna tur takngial pawh awm m,ang lovah seat chan loh hlauin kan fate hi kan khungkhawm bawk si a, nu leh pa leh kan fate hi an khawngaihthlak ka ti khawp mai.

Tichuan, han sawi ta zel ila, zirtirtu hlawh hi a lo tlem em em tih ka hre leh ta zel a, kan fate zirtirtute hlawh hian Mistiri thla khat hlawh pawh a phak tawh lo tihte ka chhut chhuak a, hengte pawh hi thil serious niin ka hmu ve a, ka sawifiah zui thiam tawh bawk si lo.

Tichuan building luah man tlawm, zirtirtu hlawh sang lo, school fee sang bawk si hi private school awm da tur a nih chuan hei baka sumdawnna ṭha hi Mizoramah a awm thei dawn em ni? tih hi ka zawhna, mipui chhan tura thiam lo tak chunga ka puan ve duh chu a lo ni ta a ni.