Mizo/ Mizoram hi min hre chiang lo mang e
Mizote hi kan chenna Mizoramah hi chuan kan ropui ve viauin kan in hre hlawm a ni maithei.
Aizawl aṭang ngat phei hi chuan Zoram hmun dang hi chu kan chhuk thlir ve viau ṭhin. Mihring nuai 10 vel lek zingah hian chhim mi, chhim kun, hmar mi, khawthlang baidul kiar, khawchhak mi kan in ti a, kan in deusawh ṭhin.
Zoram kan han kal pel a, Silchar aṭangin kan tim ṭan deuh dui a, Guwahati, Kolkata, Delhi leh hmun dangah te chuan a tam zawk hi chu kan ṭi dui tawh. Zoram chhunga kan hmuhsitho nen khan kan inang khat vek tawh mai a ni ber. Central kan tihah khuan min hre ve viau tawh emaw kan tih laiin min lo la hre chiang lo hle a ni tih chu khulama kan thil tawn ṭhenkhatah leh National Newspaper-ah te hian a chiang khawp mai. Chuvangin, tun aia Central lama (a ṭha lama) hriat kan hlawh lehzual nan nasa takin Zofate kan ṭanrual a ngai.
He kan Zoram tetakte chhunga intih engemaw viau a, kan aia changkang lo zawka kan hriatte hmusit a deu mai lo hian kan ṭanrual a ngai. Tute nge Mizo chu tih hi India rama hnam hrang hrang hian min hriat theih nan ṭan kan lak a ngai. Min hriat chian tawk lohzia tlemte ka han tarlang ang. Hengte hi chanchinbu leh facebook aṭangte a ka lak khawm an ni hlawm a, thawh belh tur hria pawh in tam ang.
1. Pu V.L.Nghaka Mizo zinga Hindi Shiksha Visarad pass hmasa ber, M.Ed ni bawkin Kolasib khawpui pa zinga miin rambuai laia Kolasiba vai sipai lo lutten ‘Khawiah nge Naga misualho an awm?’ an ti tih a sawi a. MNF leh Naga hel kha an ngaihpawlh niin a sawi: Dehloh Sakei Huai- Lalnunchanga
2. The Aizawl Post 19.10.2011 front page ‘Delhi-ah Mizo nula khuaikhem?’ - Mizo nula tiin NDTV-in a puang a, Indian Express-in Manipur nula, a dang lehin Naga nula. North East hrim hrim hi min hriat pawlh vek niin a lang. A bikin Naga, Manipuri, Mizo, Khasi leh Garo te.
3. Boxer Zoramthanga (L) kha ‘A lad from Manipur’ an ti tawh. Lalremsanga Archer kha archer ve tho Limba Ram an ti tawh bawk. Mizo hnam inchei, kan chhuan em em (traditional attire) kha ‘Naga traditional attire’ tiin Commonwealth Games, Delhi-ah puan a ni.
4. Independence Day 65-na Aizawl-ah Nephiu Rio-in flag a pawt pharh, DDK News chhun (Hindi), Zonet Fakselna 16/8/12 zan dar 6:15.
5. Outlook magazine June 8, 2013 page 35 : Laipuitlang landslide photo an tarlang a, ‘A tragedy repeated elsewhere: A landslide in Sikkim’ an ti daih bawk.
6. National Games Women’s Hockey Final, ni 11.2.15 Kollam, Kerala a khelh zawh tak chung chang Indian Express (Chennai-Vellore Late City Edition) ni 13.2.15 chhuakah chuan Punjab team-a khel, Punjab champion puitu Mizo nula pahnihte Lalremruati Khiangte No.8 leh Rosalind Lalchhanhimi No.15 te chu Manipuri nula, Imphal khawpui bul hnaia khawsa niin an ziak tih Facebook lamah an rawn pholang. Lalremruati hi Saitual khua niin Rosalind hi Durtlang khua, Women’s Hockey a India ti hming ṭha tawh ṭhintute an ni.
Khulam khuan min la hre chiang tawk lo, Football-ah National huapah vawi hnih kan champion tawh chung pawh hian Mizote hi National Football-a champion ngei kha kan ni tih hi khulam khuan an hria em aw? Sikkim emaw Nagaland emaw te hi an lo la ti daih ang tih a hlauhawm a nia! Khulamin min hriat chian lehzual theih nan a ṭha lamin ṭan i la zel ang u, min la hre chiang lo deuh chu a ni.