KRISTIAN ANGA AW NEIH
December 2014 aṭanga 2015 February thlatir thlengin Delhi-ah Biakin vawi nga teh meuh suasam a ni a, kan ram khawpui bera hetiang thil duhawm lo a thleng hi keini Kristian tan tuar thiam a va har em!
Delhi-a Biakin sawisak a thlen hnunhnun ber chu 2th Feb., 2015 khan a ni. Hemi thil thleng chungchangah hian Kristian State kan nihna angin Delhi a Biakin Suasam duh lo hawi zawngin engemaw ber kawng zawh, thuchhuah emaw poster tar etc. India Sawrkar beng thleng khawp tur Mizoramin kan huaihawt ve ngei ka lo ring a, mah se chutiang huaihawt thawm pakhat mah a awmlo hi a pawi hle mai.
Chanchinbuah tal Kristian thlavang hauhna thuziak chhiar tumin nitin chanchinbu kan lo bih a, mah se kan sakhaw hruaitute zu zawrh chungchanga au ring tak tak kha zu zawrh duhlohnaa an aunaah an aw a chhang zo ta nge? Delhi-a kan kristian puite thlavang hauhna ṭawngkam hriattur a awm lo hi a pawi tak zet zet a ni.
Delhi-ah chuan Biakin suasam duhlohna lantirin 5th Feb. khan kawng zawh a ni a, chutah chuan Police-te pawhin Kristian puithiam ṭhenkhat an man thu kan hriat bawk kha. India ram pawnah pawh sakhaw tlem zawkte nekchepna duh loh lantir an awm bawk. Khawvela ram thil ti thei ber USA President Barack Obama meuh pawhin aw chhuahin Delhi-a kristiante chunga thil thleng chu Mahatma Gandhi kha la dam ta se Gandhi-a duhdan a nih a rin bik loh thute hial a sawi a nih kha. Tin, North East India-ah keini Mizoram ang thoa Kristian tamna Nagaland State a Dimapur-ah chuan Delhi-a Biakin beih a nih avangin 7th Feb. khan lungawilohna lantirin lehkha ziak chi hrang hrang an tar a. An State CM leh Governor hnenah BJP leh RSS te chu sakhaw dang tibuai zawnga hmala lo tura ngen turin thu an thlen bawk a nih kha.
Mizoram erawh kan reh duk mai! Kan ram India ngeia kan Kristian puite tuarna thlavang hauhna chang pawh hre loa kan beng a ngawng hi kan va vanduai ve le!
An thlavang hauhna atana aw chhuah, kawng zawh, poster etc. tar lo mah ila kan ṭawngṭaipui ṭheuh turah ngai ila. Kohhran hrang hrangah ka inkhawm ve ta zauh zauh a, kohhran tam zawk chu Kohhran ṭhalai a ni emaw, Kohhran pui a ni emaw kan ṭawngṭaina thupui thawhte hian kan veng chhung bak kan pel pha lo ṭhin hi i in enfiah ang u. Central-a BJP-in sawrkarna an chelh leh hnu phei hi chuan sakhaw ṭhenkhat an huangtauzia kan hmu, chuvang chuan Mizoram tan mai ni lo India ram pum huapa ṭawngṭai hi i uar deuh deuh ang u.
Tuna Delhi-a Biak in beihna pawh hian rah ṭha lo zawk a chhuah loh nan ṭawngṭainaah hre reng ila. Ṭawngṭai chu pawimawh tho mah se Central sawrkar hriat ngei tura aw kan chhuah ve hi kan tih tur dik tak a ni. Kristiante nekchepna hi nidangah pawh he kan India ram zauah hian a lo thleng leh thei chutiang hunah chuan na taka demna thu au chhuahpui nachang hriat hi Kristian kan chep zel lohna atana kan tih tur a ni ve dawn lawm ni?