Sawi dik loh pawina

Kan thil sawi leh ziahte hian kan rin aiin hnuhma a nei thui. Kan sawi dik loh kha dika ngaiin ṭhangtharten an rilruah vawngin an sawi chhawng emaw an ziak chhawng zel ṭhin. A lo chhiar/ ngai­thlatuten dikah ngaiin an sawi/ ziak chhawng ve leh zel si a, hre loin dawt kan sawiin kan ziak reng thei a, pawi thei tak a ni.

Nl. Vanlalawmpuii Chawngthu kha MLA-ah thlantlin a nih hnu lawk khan LPS-ah biangbiakna rawn tihchhuah a ni a. Interview-tu khan "Mizo nula zinga MLA hmasa ber i ni a..." tiin a chhuanawmzia a sawi a. Ani khan "Ka ni lo e..." a ti bik hlei law.

Thlirtu tam takte chuan Mizo nula MLA hmasa berah an ngai ngei ang a, an sawi lehnaah emaw an ziah lehnaah pawh chutiang chuan an tialng ngeiin a rinawm. Mizo history emaw political history emaw a tidik lo thei hial dawn a ni. Mizo nula MLA hmasaber chu Nl. Saptawni d/o Rev. Liangkhaia a ni si a.

Mizo nun lo inthlak chhoh zel dan thua documentary film pakhatah khan DDK, Aizawlah a sawitu khan ṭha takin dik takin a sawi zel laiin, Mizo lalten an fanu ngaizawngtu hnamchawm tlangvalte chu an inneih an phal loh ṭhin thu a sawi a, a dik reng laiin, Lianchhiari pain, a fanu bialpa Chawngfianga kha neihtir phal loin a sawi ta mai a. A phal em em mai a, a man tur pawh sum ni lo; thil ho mai mai pawh sum anga pawm a remti a ni zawk a. An inneih theih lohna chhan chu Chawngfianga palai rilru dik loh vang a ni zawk si a.

Vanglaini-ah (25/26 January 2015 ni tain ka hria) 'Indopui II khan Japan khawpui pahnihah neuclear bomb thlak' nia ziah a awm a. Kum 1945 kha chuan tu sorkar mahin neuclear bomb an la siam lo niin a lang.

Atom bomb tih zawk tur a ni a, kha thu ziah kha dikah ngaiin teacher-in naupangte hnenah sawi chhawng se, thu dik lo a zirtir a ni ang a, a fel lo hle ang.

Tin, ziah chu dik mah se a sawia sawiah hian dik lo tam tak a awm ṭhin. Mizo ṭawng hi thluk nei a nih avangin a thluk dan hian, mihring hming te, khaw hming te hi a dik loa sawi a awm fo mai.

Pakhat chauh sawi ila. LPS-ah thupuan chungchang sawitu (chhiartu) khan a thluk dik loin a chhiar a. Thupuan 8:11-a arsi hming 'Sai' tih kha, rannung ke pali nei, nawn nei, sai (elephant) kan lam ang hian a lam ri a. Heta sai hi hnaisailo tiha sai angin lam tur a ni. Elephant a ni lo a, thlai lian vak lo, kha em em mai a ni a, English chuan wormwood a ni.

Bible-ah hian hmun 8-ah sawilan a ni - Deut. 29:18; Thufingte 5:4; Jeremia 9:15; Ṭah Hla 3:15, 19; Amosa 5:7 leh Thupuan 8:11 ah te. Hetah hian letlingtuten 'sai' ti vekin an dah a, tuna Bible lehlin tharah hi chuan kha, hnim kha, thil kha ti tein lehlin a ni.

Kan thil sawi tur te, kan ziah turte hi a hmain ngun taka zira enfiah hmasak ṭhin hi a ṭha. Dik lo taka puan leh ziah hi ka hmu ṭeuh mai.